Ылсан үлэлээбиппит балтараа сыл буолла

- 2010 сыллаахха үөрэхпин бүтэрээт, Маҕараска тренеринэн, онтон дойдубар, Муомаҕа баран спорткомитекка үлэлии сырыттахпына, манна ыҥырбыттара. Билиҥҥи туругунан куораттарга, улуустарга 12 филиаллаахпыт. Олорго 26 анал үрдүк үөрэхтээх тренер үлэлиир. Испииһэк быһыытынан 700-тэн тахса оҕону эрчийэллэр. Кинилэртэн аҥаардарын кэриҥэ эдэр тренердэр, онон кинилэргэ эрэлбит улахан.

Биһиги тренердэрбит Дьокуускайга Олимпийскай эрэл училищетыгарПетр Лукачевскай, ДЮСШ-4 Мария Бандерова, ДЮСШ-5 Василий Исаков, Аммаҕа Анатолий Артемьев, Алдаҥҥа Антонина Пономаренко, Нерюнгригэ Фирзинант Ахметчин, Мирнэйгэ Дмитрий Черных, Евгений Сычев, Ленскэйгэ Игорь Кахонкин ситиһиилэхтик үлэлии сылдьаллар. Кэннэки кэмҥэ Хаҥаласка, Тааттаҕа. Чурапчыга, Мэҥэ-Хаҥаласка хамсааһын тахсан эрэр.

Хайыһар базатыгар оҕолор үрдүттэн олорон үөрэнэллэр, эрчиллэллэр

Оройуоннарга баар филиалларбыт оҕолоро анал былаан быһыытынан манна кэлэн үөрэнэн-эрчиллэн, күрэхтэһиилэргэ кыттан бараллар. Ол курдук, олунньу ый бүтэһик күннэригэр араас оройуоннартан 100-тэн тахса оҕо кэлэн 2 нэдиэлэ устата манна сүүмэрдиир эрчиллиини бардылар,өрөспүүбүлүкэ Кубогын үһүс түһүмэҕэр кытыннылар. Ааспыт сайын 400-кэ оҕо кэлэн эрчиллэн барбыта.

Маны таһынан араас улуустартан отучча 6- 10-с кылаас үөрэнээччилэрин сүүмэрдээн аҕалан, эрчийэбит, үөрэтэбит. Кинилэри оскуола методистара, иитээччилэрэ, тренердэрэ көрөллөр-истэллэр.

Иллэҥ кэм диэн оҕолорго суоҕун кэриэтэ. Сарсыарда суунан-тараанан, аһаат 2 №-дээх оскуолаҕа үөрэнэ бараллар, күнүс киэһэ эрчиллиилэр саҕаланаллар. Сбордарга, күрэхтэһиилэргэ бардахтарына интернет көмөтүнэн дистанционнай үөрэхтээһин ыытыллар.

Хайыһар киинин остолобуойа оҕолору араас иҥэмтэлээх сибиэһэй аһынан аһатар: Чурапчы этэ, Хаҥалас хортуоппуйа, Якокит үүтэ, Алдан араас эгэлгэ отоно... Доруобуйаларын туругун кэтээн көрүү, эмтээһин барыта үрдүттэн оҥоһуллар.

Бастакы дьоһун ситиһиилэрбит

Быйылгы сылга киирэн баран Уһук Илиҥҥи зонаҕа оҕолорго хайыһарга сүүрүүгэ Южнай Сахалиҥҥа уонна биатлоҥҥа П-Камчатскайга буолбут күрэхтэһиилэргэ кыттан бастаатыппыт. Ленскэй оҕото Александр Клугенүс көрүҥҥэ бастаабыта, Мария Абатурова, Иван Пальцев хас да көрүҥҥэ миэстэлэспиттэрэ, Никита Шестаков уо.д.а. үчүгэй көрдөрүүлэри ситиспиттэрэ.

Ол гынан баран барыта эриэ- дэхси буолбатах...

Оройуоннарга баар филиалларбытын сөптөөх хайыһар инвентарынан хааччыйар кыахпыт суоҕунан, хайыһар спордунан дьарыктаныыга элбэх үп-ас ороскуоттанарынан үлэбитигэр элбэх уустуктары көрсөбүт. Бүгүҥҥү күннээххэ 700 хайыһардьыппытыгар 300 эрэ хайыһардаахпыт, олортон 70 эрэ күрэхтэһиигэ аналлаахтар. Итини тэҥэ филиалларбыт сөптөөх базалара суох. Инникитин бу боппуруоска күүскэ үлэлэһэр былааннаахпыт.

Биатлону эмиэ күүскэ сайыннарар соруктаахпыт

Бэргэнник ытарбыт хааммытыгар баарынан, аан дойдуга киэҥ биһирэбили ылбыт биатлону сайыннарар сыал-сорук турар. Билиҥҥи туругунан биатлонунан 1 разрядтаах оҕолорбутун дьарыктыыбыт уонна күрэхтэһиилэргэ кытыннарабыт. Инникитин сөптөөх усулуобуйа олохтоотохпутуна, оҕолору сүүмэрдээн кыра саастарыттан дьарыктыыр буолуохпут. Билиҥҥитэ Мирнэйгэ, Аммаҕа уонна манна Алдаҥҥа оҕолору түөрт тренер эрчийэр. Олортон биирдэстэрэ Башкортостан үтүөлээх тренерэ Сафаров Альберт Талгатович кэлэн үлэлии сылдьар. Биатлонҥҥа сүрүн оруолу ылар сиринэн ытар сир комплекса буолар. Биһиэхэ Дальнай Востокка суох Курвинен (Kurvinen) фирма аан дойду ирдэбиллэригэр эппиэттиир тэриллэрэ туруоруллубуттара. Аны сайын биатлон сүүрэр, ытар сирдэрин техническэй туруктара гомологизацияны аастахтарына, аан дойду таһымнаах күрэхтэһиилэри ыытар кыахтаныахпыт. Оччоҕо инникитин улахан күрэхтэһиилэр буоллахтарына, разрядтары да иҥэрэр кыахтар баар буолуохтара. Билигин биһиэхэ 50 устуука пневматическай винтовка баар, аны БИ-7-4 винтовкалар кэлэллэрин күүтэбит.

Инники былааннарбыт

Хайыһар базатын бастакы уочаратын тутуутугар федеральнай киин 125 мөл.солк., өрөспүүбүлүкэ 350 мөл.солк. үбүлээбитэ. Иккис уочарата 2015 сылга саҕаланан 2016 сылга үлэҕэ киириэхтээҕэ, кризис буолбутунан, тохтотулунна. Сүрүн сорукпутунан хайыһар спордун нэһилиэнньэҕэ киэҥник тарҕатыы, чугастааҕы кэмнэргэ биир эмэ хоту улууска үчүгэй базалаах хайыһар филиалын аһыы, тэрилтэбитин олимпиецтары бэлэмниир интернат-оскуолаҕа кубулутуу буолаллар.