Бу аҕыйах хонуктааҕыта Бүлүү куоратыттан Москва куоракка велосипедынан айаннаан иһэр Матвеев Василий Никитич Сунтаарга сылдьан ааста. Василий бэйэтэ билигин Дьокуускай куоракка олорор, кэргэннээх, икки оҕолоох. Идэтинэн – тиис бырааһа. Василийдыын көрсүһүү олохтоох дьаһалтаҕа буолла.

Сунтаар нэһилиэгин баһылыгын солбуйааччы Валерий Макаров, бэтэрээннэр улуустааҕы сэбиэттэрин бэрэссэдээтэлэ Валентин Догойдонов, ыччат отделын салайааччыта Владимир Уаров, эдэр ыччаттар Василий Матвеевы үөрүүлээх быһыыга-майгыга көрүстүлэр, ирэ-хоро сэһэргэстилэр, уһун сындалҕаннаах айаныгар соргуну баҕардылар. Аны икки ыйынан Москва куоракка Кыайыы параадыгар сылдьан, Бүлүү сүнньүгэр олорор улуустар ааттарыттан «Ураа» хаһыытаар диэн баҕа санааларын эттилэр.

Василий Матвеев бу айаҥҥа былырыын санаммыт эбит. «Билиҥҥитэ эппин-сииммин үөрэтэ таарыйа аа-дьуо айанныыбын. Сыыйа-баайа тэтиммин эбиэм. Москваҕа ыам ыйын 7 күнүгэр тиийдэрбин диэн былааннаахпын», - диэтэ Василий Никитич.

Эдэр быраас биһиги улууспутугар биэс сыллааҕыта сылдьан, бэтэрээннэр тиистэрин оҥорбутум диэн кэпсиир. Бу айаммыттан кэллэхпинэ, оҕолорго велосипедынан күрэс тэрийэр былааннаахпын, бириистэрбин булан, кэпсэтии ыыта сылдьабын диир.

Сунтаар ыччаттара киниэхэ бэйэлэрин бырайыактарын билиһиннэрдилэр. Ол курдук, аны күһүн Тойбохойго 70 киһи буолан велосипедынан туур тэрийиэхтээхтэр. Бу бырайыактара биэс сыллаах эбит. Ол курдук, Бүлүү эҥэр улуустарынан сылдьан, эстафетаны туттаран иһиэхтэрэ. Аны биэс сылынан бу вело-тур Бүлүү куоратыттан Сунтаарга кэлэн түмүктэниэхтээх. Манна кыттаар диэн Василий Матвеевы ыҥырдылар.

Көрсүһүү түмүгэр ыччат политикатын отделын начальнига Владимир Уаров айанньыкка бары үтүөнү баҕаран туран, олохтоох поэппыт Николай Егоров хоһоонун ааҕан иһитиннэрдэ уонна Сунтаар нэһилиэгин 250 сылыгар ананан оҥоһуллубут түөскэ анньыллар анал бэлиэни туттарда.