Доруобуйа акциятын кыттыылаахтарын атаарыыга СӨ доруобуйа харыстабылын миниистирин солбуйааччы Людмила Вербицкая эҕэрдэлээтэ. Кини бу акция көмөтүнэн өрөспүүбүлүкэ уонна киин сирдэртэн кэлбит эмчиттэр Саха сирин оҕолоругар бэйэлэринэн тиийэн, оҕолор доруобай буолалларыгар күүс-көмө буолалларын бэлиэтээтэ. Мустубут дьону «Хотугу сулус» куонкурус кыттыылаахтара эҕэрдэлээтилэр.

Санатан эттэххэ, доруобуйа бастакы акцията 2013 с. Өлүөнэ өрүс устун уста сылдьан, Хаҥалас, Ленскэй, Өлүөхүмэ улуустарын уонна Дьокуускай куорат кырачааннарын доруобуйаларын көрбүтэ. «Доруобуйа долгуна – бииргэ буоллахпытына күүстээхпит» иккис акция Бүлүү бөлөх улуустарынан айаннаабыта. Бу акцияҕа 3 тыһыынчаттан тахса киһи, ол иһигэр 2,5 тыһыынча оҕо доруобуйатын бэрэбиэркэлэппитэ.

«Долгун-2015» быйылгы акция Томпо, Уус-Маайа, Таатта уонна Чурапчы улуустарынан айаннаата. Акция сүрүн соругунан оҕолор доруобуйаларын биир кэлим бэрэбиэркэлээһин, Россия уонна Саха сирин бастыҥ клиникаларыгар эмтэтэ ыытыы буолаллар. Быйыл Санкт-Петербурдааҕы педиатрия университетын, Иркутскайдааҕы Судаарыстыбыннай медицинскай академия учуонайдара уонна сүрүннүүр үлэһиттэрэ кытталлар. Кинилэр ортолоругар кардиолог, педиатр, ревматолог, хирург-ортопед, эндокринолог, лор, офтальмолог, психиатр, УЗИ быраастара бааллар. Ону таһынан, мэлдьи буоларын курдук, медицинскэй профилактика өрөспүүбүлүкэтээҕи киинин, оҕо куораттааҕы балыыһатын уонна 5 №-дээх поликлиника мобильнай биригээдэлэрэ үлэлиэхтэрэ.

СӨ Спорка министиэристибэтин, Бэчээт уонна телевидениенэн биэрии дьыалаларыгар департамент бэрэстэбиитэллэрэ «төгүрүк остуоллары», лекциялары, семинардары уо.д.а. дьаһаллары ыытыахтара.