Саха сирин уустарын уонна металлурдарын ассоциациятын чилиэнэ, тимиринэн уһаныыга норуот маастара, бу тэрээһини көҕүлээбит Роман Готовцев, Саха сирин уустаран уонна металлурдарын ассоциациятын чилиэнэ, Россия Уустарын союһун чилиэнэ Михаил Куприянов уһанар дьыалаҕа семинар ыыттылар.

Сүрүн түгэнинэн тимир рудатыттан өбүгэлэр технологияларынан тимири уһааран ылыы буолла. Үлэ биир нэдиэлэ курдук барбыт: уот сиэбэт кирпииччэлэриттэн оһох туппуттар, сыбаабыттар уонна куурдубуттар, 50 кг рудалаах тааһы хомуйбуттар. Бу үлэни барытын эрдэ кэлбит Илларион Попов салайбыт. Анаммыт күнүгэр сарсыардаттан Саха сирин Духуобунаска академиятын академига, норуот маастара Борис Федорович Неустроев-Мандар Уус алгыһынан тимири уһаарыыны саҕалаатылар. Ити үлэҕэ алта-сэттэ чаас бириэмэ барар эбит. Атын оройуоннарга итинник уһаарыыга электрическай күөтү туһанар буоллахтарына, бу сырыыга былыргылыыга майгыннатан саха күөтүн оҥороннор тутуннулар. Уулларыллыбыт тимир көһөҥөтө 27 кг 500 гр ыйааһыннаах буолла. Бу Саха сирин чыпчаал көрдөрүүүнэн буолар. Тимир уһаарааччылар биир да оройуоҥҥа маннык түмүгү ситиспэтэхтэр, сороҕор уһаарыллыбыт тимирдэрэ 4-5 кг эрэ буолар эбит.

Маны кытта сэргэстэһэ норуот уус-уран тарбахтаахтарын быыстапката ыытылынна. Барыта аҕыс номинациянан үлэлэр туруоруллубуттар. Кыайыылааҕынан Федор Готовцев («Мастан уонна туостан оҥоһуктар»), Александр Рудых («Уус дьарыга»), Дария Колодезникова («Оҕуруонан тиһии», «Саха таҥаһа», «Быысапка»), Сардаана Павлова («Сылгы кылыттан оҥоһуктар»), Елена Аммосова («Сувенирнай оҥоһуктар»), Александра Гуринова («Кырадаһынтан тигиилэр») буоллулар. Быыстапкаҕа барыта 80 киһи, ол иһигэр 15 үөрэнээччи кыттыыны ылла.