Кулун тутар 17 күнүгэр И.Е. Винокуров төрөөбүт-үөскээбит сиригэр Аппааныга, Илья Егорович аатынан кыраайы үөрэтэр музейга «НамАвтоЛеди» кулууп суоппар кэрэ аҥардарын: Анастасия Заболоцкаяны, үлэ ветеранын, Нам улууһун бочуоттаах олохтооҕун, Паша Ангелина аатынан Бүтүн Союзтааҕы бириэмийэ лауреатын, РФ тыатын хаһаайыстыбатын үтүөлээх механизаторын Екатерина Маркованы, үлэ бэтэрээнин, СР тыатын хаһаайыстыбатын туйгунун Антонина Маркованы, элбэх оҕолоох ийэни, шофер-слесарь уонна технология учууталын, «Сахабулт» иистэнньэҥин Александра Иванованы, үлэ бэтэрээнин, үрдүк категориялаах мед-сиэстэрэни, предприниматель Татьяна Соловьеваны, математика учууталын, предприниматель Лена Попованы уонна лектор быһыытынан автопробег кыттыылааҕын, үлэ бэтэрээнин, Хатыҥ Арыы нэһилиэгин ытык киһитин, И.Е. Винокуров аатынан кыраайы үөрэтэр музей быыстапкатын салаатын сэбиэдиссэйин Людмила Петрованы үөрүүлээх быһыыга истиҥ-иһирэх тыллаах атаарыы тэрээһинэ буолла. Суоппар кэрэ аҥардары этэҥҥэ сылдьан кэлэллэрин туһугар Айыылартан ааттаһан, Күн өркөн уустарыттан көрдөһөн, норуот ырыаһыта Дмитрий Кривошапкин алгыс сиэрин-туомун толордо.

Ыраах айаҥҥа турунар кэрэ аҥардары «Нам улууһа» МТ баһылыгын бастакы солбуйааччы Артур Яковлев, СР ыччат уонна дьиэ кэргэн политикатын министрин солбуйааччы Анна Пермякова, Сир тула дьахталлар автоэкспедицияларын тэрийээччи, салайааччы Оксана Новгородова, «Нам улууһа» МТ ыччат уонна дьиэ кэргэн отделын салайааччы Татьяна Степанова, «Ленскэй нэһилиэк» МТ баһылыга Андрей Новгородов, «Хатыҥ Арыы» МТ баһылыгын солбуйааччы Герман Марков эҕэрдэлээтилэр, баҕа санааларын эттилэр уонна тиийбит улуустарыгар өйдүү-саныы сылдьалларыгар Наммыт улууһун, нэһилиэктэрин историятын сырдатар кинигэлэри туттардылар. Харда тылыгар Анастасия Степановна кэлбит ыалдьыттарга, күүс-көмө буолбут тэрилтэлэргэ махтанна.

«Улуу Кыайыы, Албан аат үйэлээх суолунан» автопробег кыттыылаахтара айаннаары туран Саха норуотун чулуу уола, бөдөҥ салайааччы, государственнай общественнай-политическай деятель, биир дойдулаахпыт И.Е. Винокуров өйдүбүнньүгэр сүгүрүйэн туран гирлянда уурдулар. Онтон «Хатыҥ Арыы» МТ баһылыгын солбуйааччы Герман Герасимович айанныыр маршруттарын каартатыгар айаҥҥа туруммуттарын бигэргэтэн бэчээт туруорда уонна илии баттаата. Тэрээһиҥҥэ Саха сиригэр кэлэ сылдьар Монголия дьахталларын делегацията кыттыыны ылла.

Анастасия Степановна айанын туһунан бу курдук кэпсээтэ: «1977 сыллаахха Нам улууһун эр бэртэрэ үс ый устата М.К. Аммосов үлэлээбит Казахстан, Киргизия республикаларынан мотоциклынан айаннаабыттар. Оттон биһиги Кыайыы 70 сылынан уонна И.Е. Винокуров төрөөбүтэ 120 сылынан үлэлээн ааспыт Бүлүү бөлөх улуустарынан, тэрийсибит Өлөөнүгэр тиийэ барарга сыал-сорук туруоруммуппут туолан эрэриттэн астынабыт, үөрэбит. Айаммытыгар уматыгынан көмөлөспүт «Нам улууһа» МТ баһылыгар Александр Атласовка уонна бары өттүнэн күүс-көмө буолбут Ленскэй нэһилиэк дьаһалтатын баһылыгар Андрей Новгородовка, Хатыҥ Арыы нэһилиэгин дьаһалтатын баһылыгар Юрий Слепцовка, «КопирТехСервис» ХЭТ дириэктэригэр Александр Никифоровка уонна И.Е. Винокуров аатынан НПК уонна Н.М. Рыкунов аатынан улуустааҕы библиотека коллективтарыгар улахан махталбытын тириэрдэбит».