Фестивалы бастакынан ыраах сытар Берёзовка нэһилиэгэ саҕалаабыта. Эбээн норуотун төрүт култууратын арыйар концертара уратытык көстүбүтэ. Салгыы Алаһыай, Бастакы Хаҥалас, Иккис Хаҥалас, Хатыҥнаах, Иккис Мээтис уонна Байды нэһилиэктэрэ кыттыбыттара. Санатан эттэххэ, нэһилиэктэр туспа сыаналаммыттара.

Хатыҥнаах нэһилиэгэ олох атын таһымҥа кыттыбытын бэлиэтиэххэ наада. Ону көрөөччүлэр даҕаны бэлиэтии көрдүлэр. Улуу Кыайыы 70 сылын көрсө нэһилиэктэн 5 саастаах кырачааныттан саҕалаан аҕа саастаах бэтэрээҥҥэ тиийэ лоп курдук 70 киһи кэлэн кыттыбыта. Онон бу бэлиэ датаны ити курдук ис хоһоонноон сырдаттылар.

Иккис бөлөххө улуус киинин 40-ча тэрилтэтэ 9 бөлөххө арахсан кытынна. Урут сыанаҕа тахса илик дьону көрөн көрөөччүлэр олус биһирээтилэр.

Икки нэдиэлэ устата барбыт фестиваль түмүктэрэ бу курдук буоллулар. Нэһилиэктэргэ үһүс миэстэни — Арҕахтаах, иккис миэстэни — Хатыҥнаах, оттон бастакы миэстэни — Налимскай бөһүөлэктэрин айар коллективтара ылан үөрдүлэр-көттүлэр.

Үлэ коллективтарыгар үһүс миэстэни Орто Халыма куорат дьаһалтата, “Алмазкредитсервис”, миграционнай сулууспа, суут приставтар, быыһыыр сулууспа, “Коммунтеплосбыт”, “Якутопторг” уонна “Халыма долгуннара” хаһыат эрэдээксийэтин коллективтара ылары ситистилэр. Иккис миэстэҕэ Оҕо искусствотын оскуолатын кытта аэропорт холбоһуктаах коллективтара таҕыстылар. Оттон кыайыылааҕынан “Сказка” оҕо сайдар киинэ, бэтэрээннэр сэбиэттэрэ, ЫБМ сулууспата буоллулар.

Кыайыылаахтары таһынан чаҕылхай нүөмэрдэргэ анал номинациялар олохтонон хаһаайыннарын буллулар. “Көрөөччүлэр биһирэбиллэрэ” диэн анал номинация Алаһыай нэһилиэгин айар коллективыгар тигистэ.

Бу фестиваль өссө биир уратытынан, аһымал акция тэриллибитэ буолла. Ол курдук, Орто Халыма куорат олохтооҕо, Дьокуускайга үөрэнэ сылдьар 18 саастаах устудьуон Ваня Дьячковка сүрэҕэр ыарахан операция оҥоһулларыгар көмө харчы хомулунна. Онон, өрүү буоларын курдук, Халыма дьоно-сэргэтэ биир сомоҕолуубутун көрдөрдүбүт.