Холуонналар күнүс 12 чаастан саҕалаан, дьоруой-куораттарга анаммыт мемориальнай плиталар тастарыгар тохтуу-тохтуу, хаамтылар. Улуу Кыайыы туһугар сырдык олохторун толук уурбут буойуттар, тыылга өлбүттэр сырдык кэриэстэригэр мүнүүтэҕэ саҥата суох нөрүйэн турдулар.

Аҕа дойдуну көмүскүүр Улуу сэрии кыайыылаахтарыгар анаммыт монумеҥҥа веногу бастакынан Егор Борисов уурбутун кэнниттэн Умуллубат уот лампаадатын сиэрэ-туома саҕаланна. Москваҕа ыам ыйын 6 күнүгэр ыытыллыбыт Бүтүн Россиятааҕы «Умуллубат уот эстафетата» патриотическай акция кыттыылааҕа, подполковник Евгений Петунин хамандыырдаах бочуоттаах харабыл Умуллубат уоту өрөспүүбүлүкэ баһылыгар туттарар. Егор Афанасьевич Умуллубат уоттан саҕан, сэрии уонна үлэ бэтэрээннэрин Дьокуускай куораттааҕы сэбиэтин салайааччы Михаил Поповка биэрэр. Уот кыыма бэтэрээннэртэн эдэр ыччаттарга, ХИФУ студена Артем Евмененкоҕа уонна байыаннай ырыа куонкурсун кыайыылаах этэрээтин хамандыыра, куорат гимназиятын үөрэнээччитэ Витя Рожиҥҥа туттарыллар. Саа ньиргиэрдээх тыаһыгар доҕуһуоллаттан, өлбүттэр кэриэстэрин уонна эйэҕэ, олоххо таптал кэрэһитэ буолан, Умуллубат уот күлүбүрэччи уматыллар!

Умуллубат уокка өрөспүүбүлүкэ салалтата, норуот депутаттара уан бары мустубут дьон, ол иһигэр «Өлбөт үйэлээх полка» куоатаҕы акция кыттыылаахтара веноктары уонна гвоздика сибэккилэри уурдулар.