Тымныы күнү аахсыбакка (таһырдьа 40 кыраадыс тымныы будулуйар), оҕолор төрөппүттэрин кытта кэлэннэр бырааһынньыктааҕы тэрээһиҥҥэ кытыннылар. Мустубут дьону Хардаҥ уонна Үрүҥ эһэлэр, Сылгы уонна үүнэр сыл символа — Коза салалллан иһэр Саҥа дьылынан эҕэрдэлээтилэр, бенгальскай уоттары түҥэттилэр. «Аар-Аартык» ансамбль "Снежинки" композицияны көрдөрдө.

Саха сирин баһылыгын аатыттан Ил Дархан уонна правительство дьаһалтатын салайааччы Юрий Куприянов эҕэрдэлээтэ.

«Саҥа дьыл буолара 19 хонук хаалла. Харыйа хас биирдии уота биһиэхэ үтүөнү аҕалар феялар тустарынан сэһэргээтин, оттон төбөтүгэр суһумнуур сулус саҥа ситиһиилэргэ сирдээтин. Хас биирдии күн үтүөнү, дьикти көрсүһүүлэри күүтүү үөрүүтүнэн туоллун. Саҥа дьыллааҕы харыйа үгэһэ оҕолор, республика олохтоохторун бүттүүнүн үөрүүтүгэр куруутун баар буоллун!», - диэтэ Юрий Степанович.

Маннык бырааһынньык Моруос Оҕонньоро уонна Хаарчааната суох буолбат — мустубут дьон бары кинилэри кытта бииргэ: «Биир, икки, үс - Харыйачааммыт күлүмүрдээ!», - дииллэрин кытта 16 миэтэрэ үрдүктээх харыйа араас уотунан суһумнуу оонньоото. Бырааһынньыктааҕы салют буолла.