Виктор Лебедев: «Дагестаҥҥа буолбут дойду чемпионатыгар кыайбыппыттан үөрэбин»

Ыам ыйа Саха сирин спортсменнарыгар соргулаахтык саҕаланна. Ол курдук, Азия чемпионатыгар (Доха, Катар) Кыргызстан аатыттан тустубут Айаал Лазаревпыт 125 киилэҕэ диэри ыйааһыҥҥа бастыыры ситистэ; Россия чемпионатыгар (Каспийскай, Дагестан) күөн туттар бөҕөспүт Виктор Лебедев дойду биэс төгүллээх чемпионунан буолла; классическай марафоҥҥа Россия чемпионатыгар (Казань, Татарстан) Сардаана Трофимова эрэллээхтик бастаата; тхэквондоҕа аан дойду чемпионатыгар (Челябинскай, Россия) Руслан Поисеев үһүс бириистээх миэстэни ылла.


Бэҕэһээ правительство 2 №-дээх дьиэтин мунньахтыыр саалатыгар көҥүл тустууга аан дойду икки, Россия биэс төгүллээх чемпиона Виктор Лебедев суруналыыстарга пресс-конференция биэрдэ.
«Дойду түһүлгэтигэр анаан -минээн сыл аҥара бэлэмнэммитим. Былырыыҥҥытааҕар дьарыгым үчүгэй этэ. Тохтобул кэнниттэн сыыйа-баайа чөлбөр түһэн эрэбин. Олимпийскай оонньууларга туругум өссө үчүгэй буолуо дии саныыбын.
Дойду чемпионата үрдүк таһымнаахтык барда. Дагестаҥҥа, Саха сиригэр курдук, тустуу бастакы нүөмэрдээх спорт көрүҥүнэн буолар.Онон онно тустар олус интэриэһинэй. Күрэхтэһии күүрээнэ, былырыын Дьокуускайга курдук, үрдүк этэ. Ол эрээри дьонум-сэргэм иннигэр тустар быдан ыарахан, уйулҕа өттүнэн. Эппиэтинэһэ улахана бэрт», - диэтэ Россия биэс төгүллээх чемпиона.
«Дагестаҥҥа тустууну сөбүлүүллэр, билэллэр. Онон онно тиийэн кыайыыны ситиспиппиттэн үөрэбин», - диэн эттэ кини.
Виктор сылтан сыл дойду чемпионатыгар тустар ыараан иһэрин ыйда, Кавказ эдэр бөҕөстөрө кимэллэрин, тустар маастарыстыбалара сыллата үрдээн иһэрин бэлиэтээтэ, Олимпиада иннинэ хапсыһыылар өссө сытыырхайыахтарын эттэ.
Аны биир ыйынан Баку куоракка буолар Европа оонньууларыгар тустуон дуо диэн ыйытыыга, Виктор турукпуттан көрүөм, бэйэм кыттыахпын баҕарабын, сарсын Адлерга көтөбүн, онно тренердэрим туох дииллэринэн буолуо, туһун диэтэхтэринэ тустуом, диэтэ.