- Эйиигин уонна эн доҕоргун Денис Царгушу кыһыл көмүс мэтээли ылбыккытынан истиҥник эҕэрдэлиибин. Бэйэ-бэйэҕитигэр «ыарыйдыгыт» дуо?

- Улахан баһыыба. Биллэн турар, кини кыайыан мин олус күүскэ баҕарбытым. Кини туһугар ыалдьан тырыбынаттан ыһытаабыт-хаһытаабыт ыалдьааччыларга эмиэ улаханнык махтанабын. Денис аан дойду икки төгүллээх, Европа түөрт төгүллээх чемпионнара, олимпийскай оонньуу призера.

- Чемпионат тэрээһинин туһунан туох диэҥ этэй?

- Биһиэхэ Саха сиригэр тэрээһин хаһан да куһаҕан, мөкү, мөлтөх буолбат. Барыта куруук үрдүк таһымнаахтык барар. Чемпионат Саха сиригэр ыытыллыбыттан мин муҥура суох үөрэбин. Турнир кэмигэр спортсменнар бука бары биир тэҥ усулуобуйаҕа сылдьаллар. Ким ордук бэлэмнээх, ол бэйэтин үчүгэйдик көрдөрөр.

- Атын дойдуга буолбакка, бэйэ дойдутугар көбүөргэ тахсар чэпчэки дуу, эбэтэр күрэхтэһии ханна буолара оруолу оонньообот дуу?

Дьон тырыбынаттан олорон өйүүрэ күүскэр күүһү, санааҕар санааны эбэрэ чахчы. Мин Саха сирин сүүмэрдэммит хамаандатын хапытаана этим. Онон улахан эппиэтинэстээх курдук санаммытым. Ол эрээри, атын өттүттэн ыллахха, манна күрэхтэһэр уустуктаах. Тоҕо диэтэххэ, бары миэхэ ыалдьаллар, кыһыл көмүстэн атыҥҥа баҕарбаттар.

- Финалга киирсиигэ туох соһуччу, үөйбэтэх-ахтыбатах түгэниҥ тахсыбыта дуу?

- Финалга  (Виктор Омака Сюрюну 6:2 ахсаанынан хоппутуа. Ред,- СИА) киһи күүппэтэх түгэнэ диэн суоҕа. Мин оҕо эрдэхпиттэн кинини кытта тустабын. Көбүөргэ хаста да көрсүбүппүт, онно барытыгар мин кыайбытым. Бииргэ дьарыктанабыт, үгүстүк тустабыт. Ол да үрдүнэн финалга киирсии син биир чэпчэки, судургу буолбатах этэ.

 Виктор Лебедев кыайыытын, чемпионат тэрээһинин туһунан дойду сүүмэрдэммит хамаандатын тренерэ  Магомед Гусейнов эттэ:

- Бу ыйааһыҥҥа Ташкеҥҥа Виктор Лебедев эрэ наада. Ити итэҕэли кини тилэри толордо. Россияҕа Викторы куоһарар ким да суох. Сүүмэрдэммит хамаандаҕа билигин көлүөнэлэр бэйэ-бэйэлэрин солбуһаллар. Хамаанда олимпиада цикылыгар бэлэм буолуоҕа. Мин республика салалтатыгар, чуолаан Егор Борисовка, тэрийэр бөлөххө, судьуйаларга улаханнык махтаныам этэ. Сыыһа-халты, алҕас суох. Барыта үрдүк таһымнаахтык ааста. Саха сирэ көҥүл тустууга ураты болҕомтотун уурарын ойуччу тутан бэлиэтиэх этим.