Ити туһунан сонуну Саха сирин вице-президенэ Дмитрий Глушко социальнай ситиминэн үллэһиннэ. Кини Пакьяоны кытта Филиппины киин куоратыгар Манилаҕа Азия Олимпийскай сэбиэтин 32-с генеральнай ассамблеятын толорор кэмитиэтин мунньаҕар көрсүбүт.

«Бэҕэһээ Россия Филиппиныга посола Николай Кудашев мин көрдөһүүбүнэн номох буолбут боксер Эммануэль Дапидран "Мэнни" Пакьяоны кытта көрсүһүүнү тэрийдэ. Кини ситиһиилэрин ааҕар наадата суох. Кини Филиппины конгрессменэ, киинэ артыыһа, ол эрээри сүрүнэ — кини оҕо спордун көҕүлээччи», - диэн Глушко Facebook страницатыгар суруйбут.

СИА Дмитрий Глушконы кытта кэпсэттэ, онно кини Пакьяоны кытта үс сөбүлэһии түһэрсибитин бигэргэттэ. Pac-man Дьокуускайга кэлэрин таһынан, Манилаҕа Филиппины уонна саха спортсменнарын икки ардыларыгар оҕолор турнирдара эбэтэр матчевай көрсүһүүлэрэ тэриллиэ, ону кытта, Мэнни «Азия Оҕолоро» оонньуулар аан дойдутааҕы посолларын боломуочуйатын ылынарга сөбүлэстэ.

Эммануэль Дапидран «Мэнни» Пакьяо – Филиппины профессионал-боксера. 8 ыйааһыҥҥа чемпион. 18 сыллаах карьератын устатыгар 62 киирсииттэн, 55 кыайыыны ситиспитэ, (олортон 38 - нокаутунан), 5-тэ кыайтарбыта, 2-тэ тэҥнэспитэ. Америка спордун академиятын 2009 сыллаах бастыҥ спортсмена.