Миниистир этэринэн, ааспыт сыллаахха элбэх саҕалааһыннар тирэхтэрэ ууруллубуттара, олор сотору кэминэн көдьүүстэрэ көстүөҕэ. Холобура, сүөһү иитиитин өйөөһүҥҥэ олох саҥа хамсатыылар оҥоһулуннулар. Сүнньүнэн, табаары оҥоруу сайдыытыгар хайысха ылылынна. Сыл устата республикаҕа федеральнай миниистир Николай Федоров иккитэ кэлэ сырытта. Саҥа хотоннор тутулуннулар, ас комбинаттара сөргүтүлүннүлэр, сүөһү өлөрөр сыахтар киирдилэр, тыаҕа эдэр специалистарга дьиэлэр тутуллаллар. Тыа сиригэр бэйэ дьиэтин туттууга программаны олоххо киллэриигэ республика Россияҕа сэттис миэстэни ылар. Миниистир ону таһынан быйыл Дьокуускайга федеральнай министерство көһө сылдьар коллегията кэлэрэ былааннанар диэтэ.

Тыа хаһаайыстыбатын оҥорон таһаарыытыгар бэйэтин сыанабылын народнай депутат Дмитрий Саввин биэрдэ. "Төһө да үбүлээһин элбэҕин иһин, салаа төттөрү уунара суох. Миэстэтигэр оҥорон таһаарыы улааппат, сүөһү ахсаана эбиллибэт», – диэтэ кини.

Народнай депутат, Арктика уонна олохтоох аҕыйах ахсааннаах омуктар кыһалҕаларыгар кэмитиэттэрин бэрэссэдээтэлэ Елена Голомарева Арктика сылыгар таба иитиитин сайдыытыгар ураты болҕомтону уурарга ыҥырда. «Билигин республика үрдүнэн табаһыт хамнаһа ортотунан 7-8 тыһыынча солкуобай. Хамнас боппуруоһа салааҕа эдэр специалистары тардыыны кытта ыкса ситимнээх», – диэтэ кини.

Булун улууһун балыксыттара, «Чекуровка» община баһылыга Семен Сергеев, «Амма» СХППК баһылыга Иван Емельянов, Нам улууһун «Кулаада» КХ баһылыга Радик Лукин, Уус-Алдантан «Илларионов Д.В.» КХ баһылыга Дмитрий Илларионов бэйэлэрин санааларын уонна баҕаларын эттилэр. Сүнньүнэн, кинилэр министерство үлэтин астыналлар. Министерство атын сиртэн үбүлүүр буолла, граннары биэрэр диэн бэлиэтээтилэр.