«Россия ийэлэрэ» уопсастыбаннай хамсааһын бүтүн Россиятааҕы конференциятыгар Саха сириттэн тиийбит делегация элбэх оҕолоох ыалга социальнай дьиэ туттуллара уолдьаспытын уонна дьиэ кэргэҥҥэ күүс өттүнэн күһэйиини эрдэттэн сэрэтэр сокуон барыла ылылларын туруорустулар.  Бу туһунан Дьокуускайдааҕы куорат Думатын вице-спикерэ Марина Силкина иһитиннэрдэ.

Конференцияҕа дьиэ кэргэн, дьахтар уонна оҕо эйгэлэригэр государственнай политика боппуруостарын олоххо киллэрии боппуруостара көтөҕүлүннүлэр. Конференция кыттыылаахтара бэлиэтээбиттэринэн, дойдуга бүттүүнүгэр дьиэ кэргэҥҥэ уустук быһыы-майгы үөскээбит: ыал баһыйар үксэ толорута суох дьиэ кэргэн.

Аҕа анал туруга, кини дьиэ кэргэҥҥэ ылар оруола ырытыһыы киининэн буолла. Тэрээһин кыттыылаахтара аҕа анал туруга, кини оруола үрдүөхтээҕин туһунан эттилэр. «Воронеж бэрэстэбиитэлэ Наталия  Вожова бу уобаласка уопсастыбаҕа оҕолоох эр дьоҥҥо болҕомто уурулларын туһугар  «Аҕа Күнэ» бэлиэтэнэрин уонна «Аҕаҕа албан аат» бэлиэ олохсутуллубутун туһунан кэпсээтэ, - диир депутат. – Биллэрин курдук, аан дойдуга аҕа күнэ киэҥник бэлиэтэнэр эрээри, Россияҕа бу күн официальнайдык билиниллэ илик. Биһиэхэ Саха сиригэр аҕа күнэ бэлиэтэнэрин истэн үгүстэр соһуйдулар. Бу күнү республика бастакы Президенэ Михаил Николаев өссө 1990 сыллаахха сокуонунан олоххо киллэрбитэ. Бу күнү биһиги муус устар бастакы өрөбүлүгэр бэлиэтиибит».

Буолан ааспыт бүтүн Россиятааҕы конференцияҕа элбэх оҕолоох ыалы өйүүргэ туһаайыллыбыт боппуруостар сытыытык турбуттар. «Россия ийэлэрэ» хамсааһын иилээччитэ-саҕалааччыта Валентина Петренко  регионнар уопуттарын ырытан көрөн баран, кинилэр этиилэриттэн, туруорсууларыттан дьоһуннааҕа уонна ураты наадалааҕа федеральнай таһымҥа дьүүллэһиллиэҕэ.

Итини таһынан конференция кыттыылаахтара кулун тутар 6 күнүгэр Федераия Сэбиэтин бэрэссэдээтэлэ Валентина Матвиенконы кытта көрсөн  2012 — 2017 сылларга оҕо интэриэһин көмүскүүр Национальнай стратегияны дьүүллэспиттэр.