«Оннук, Үөһээ Бүлүүгэ, Намҥа, Хаҥаласка оҕолору төрөппүттэриттэн былдьыылларыгар РФ Дьиэ кэргэн кодексатын балаһыанньалара элбэхтэ кэһиллибиттэр», - диэтилэр прокуратураҕа.

Сорох оҕо дьиэтигэр туттуллуохтаах кэмэ ааспыт эми-тому, аһылыгы тутта сылдьыбыттара быһаарылынна. Аһылыгы тэрийиигэ сокуону куруубайдык кэспиттэрэ билиннэ. Холобур, Бүлүүтээҕи оҕо дьиэтигэр 2014 сыл кулун тутарыгар оҕолорго 475 гр. оҕуруот аһын биэриэхтэрин оннугар, бу дьиэ иитиллээччиллэрэ баара-суоҕа 194 гр. аһаппыттар. 51 гр ынах арыытын оннугар, оҕолорго 9,5 гр биэрбиттэр. 500 гр үүт оннугар 191 гр үүтү иһэрдибиттэр.

Үөһээ Бүлүүгэ оҕолор икки нэдиэлэлээх аһылыктарыгар балык суох, үүт аһылыгы кып-кыраны биэрэ олорбуттар.

Ити курдук уонна итиниэхэ майгынныырдык үгүһү холобур быһыытынан аҕалыахха сөп. Оҕо тус докумуонун толорууга баар ирдэбил тутуһуллубат, оҕолор дьиэҕэ-уокка, алимеҥҥа материальнай бырааптара тутуһуллубат. Санитарнай нуорманы кэһии эмиэ элбэх.

Үөрэх министиэристибэтэ хонтуруоллаабатын, субвенцияны баҕарбыттарынан дьаһайбыттарын түмүгэр 2013-2014 сылларга Нерюнгритааҕы, Өймөкөөннөөҕү, Хаҥаластааҕы, Бүлүүтээҕи, Мэҥэ-Хаҥаластааҕы, Үөһээ Бүлүүтээҕи оҕо дьилэрин иитиллээччилэрин ороскуоттара ситэри үбүлэммэтэх.

Мохсоҕоллоохтооҕу оҕо дьиэтин салайааччыта 11,8 тыһ. солк. сахалыы таҥаһы атыыласпыт. Ити бюджет кодексын 34 ыстатыйатын утарар. Тулаайах уонна төрөппүт көрүүтэ-харайыыта суох хаалбыт оҕолор дьиэлэрин биир үлэһитигэр 403 тыһ. солк. хамнаһы сокуоннайа суох төлөөбүт.

Хаҥаласка баар оҕо доруобуйатын чөлүгэр түһэрэр киин иитиллэччилэригэр эми-тому төрөппүттэртэн хомуйбуттар.

Мэҥэ- Хаҥаласка реабилитационнай киин дириэктэрэ 2013 сыллаахха суотабай сибээһи төлүөн оннугар 2 суотабай телефону уонна 2300 солк. суумалаах симкаарталары атыыласпыт. Ити курдук, үбү-харчыны аналыттан атыҥҥа туттуу, туһаныы элбэх.