Үөрүүлээх чааска киин директора Александра Яковлева 352 тыһыынча солкуобайдаах оҕо оонньуур комплексын ылыыга СР Үлэҕэ уонна социальнай сайдыыга министерствота көмөлөспүтүн этэн туран, социальнай-реабилитациялыыр киин сайдыытыгар мэлдьитин күүс-көмө буолар попечителлэргэ махталын биллэрдэ.

Оҕолору уонна Киин үлэһиттэрин Мэҥэ-Хаҥаластааҕы социальнай көмүскэллээх буолуу управлениетын социальнай хааччыйыыга отделын сэбиэдиссэйэ Мария Федорова, Майа сэлиэнньэтин депутаттарын сэбиэтин бэрэссэдээтэлэ Антонина Федорова, улуустааҕы киин балыыһа кылаабынай педиатра Екатерина Дьяконова о.д.а. эҕэрдэлээтилэр. Педагог Лариса Шарина оройуон баһылыгын грамотатынан наҕараадаланна.

Площадканы аһыы аалай лиэнтэтин Киин үлэһитэ Наталья Чечебутова, Майа сэлиэнньэтин депутаттарын сэбиэтин бэрэссэдээтэлэ Антонина Федорова уонна кырачааннартан Вика Скрябина ытыс тыаһын ортотугар быстылар.

Киин үлэһитэ Степан Копырин, В.П.Ларионов аатынан Майа орто оскуолатын 3 «в» кылааһын үөрэнээччилэрэ уонна Киин иитиллээччилэрэ музыкальнай эҕэрдэлэрин тиэртилэр. Бу күн Киин иитиллээччилэрин оҥоһуктарын быыстапката туруорулунна. Кинилэр ыалдьыттартан, попечителлэртэн оонньуур бэлэхтэри туттулар.