Бу күрэхтэһии түмүктүүр түһүмэҕэ Аммаҕа буолла. Кыттааччылар улахан күөнтэһиилээх түһүмэхтэргэ күрэстэстилэр. Кинилэр бэрэбинэни таҥастаатылар, мас хайытан, бэлэмнээтилэр, остуолбаҕа хатаастан таҕыстылар. Итинтэн да атын көрүҥнэргэ инники кирбиигэ тахсар туһугар дьулустулар. Үгэс быһыытынан, дьиэ кэргэн бэйэтин билиһиннэриититтэн күрэс саҕаланна. Манна  1998-2000 сылларга төрөөбүт уолаттардаах барыта 12 аҕа кытынна. Аҕалар өрөспүүбүлүкэ араас муннуктарыттан: Амматтан, Үөһээ Бүлүүттэн, Үөһээ Дьааҥыттан, Горнайтан, Мэҥэ-Хаҥаластан, Намтан, Тааттаттан, Уус-Алдантан, о.д.а. улуустартан хото муһуннулар.

Билиини-көрүүнү тургутууга, араас психологическай быһыыттан-майгыттан сөптөөхтүк тахсар суолу тобулууга кыттааччылар күрэхтэстилэр.

Уол уонна аҕа бэрэбинэни таҥастаатылар, хайыттылар, саһааннаатылар. 

Ити курдук, кинилэр хас да түһүмэх аайы дьоҕурдарын, сатабылларын көрдөрдүлэр. Булт биатлонугар уол оҕо 3 кг. ыйааһыннаах сүгэһэрдээх хайыһарынан 100 м. сүүрдэ. Пневматическай бинтиэпкэнэн сыал ытта уонна таһаҕаһын уонна хайыһарын иккис кыттааччыга биэрдэ.

Хамаанданан күрэхтэһии түмүгэ:

1 миэстэ – Альберт Соловьев уолунаан  Айталлыын, Эмис нэһилиэгэ, Амма;

2 миэстэ – Герман Христофоров уолунаан Васялыын,  Сулҕаччы, Амма;

3 миэстэ – Ариан Александров уолунаан Айааллыын, Горнай.

Бириистээх миэстэҕэ тиксибит кыттааччылар сыаналаах бириистэринэн, дипломнарынан, кубоктарынан наҕараадаланнылар. Ыччат уонна дьиэ кэргэн политикатын миниистирэ  А. Владимиров биһирэбил бирииһи - батаһы туттарда . Оҕолор «Бэс Чагда» доруобуйа киинигэр сынньаныахтара.