Олунньу 22 күнүгэр Өксөкүлээх Өлөксөй аатынан норуоттар доҕордоһууларын дьиэтигэр Дьокуускайдааҕы Марк Жирков аатынан музыкальнай колледж төрүт ньымаларыгар уһуйуллуу салаатын устудьуоннара кыттыылаах, биллиилээх «Айархаан» этно-бөлөх, «Ситим», «Дыгын», «Тойук» өйөөһүннэх Сунтаар Уолана Айсиэн Сүөдэрэп айар киэһэтэ буолан ааста. Маны таһынан, бу киэһэ ол күн ыытыллыбыт Республикатааҕы «Өбүгэ быстыбат ситимэ» фольклорнай түһүлгэ кыайыылаахтара кыттыыны ыллылар.

Айсиэн Сунтаар улууһун Кутанатыгар бэһис оҕонон Сүөдэрэптэр дьиэ кэргэттэригэр күн сирин көрбүтэ. Тойуксут эбээтин Самсонова Варвара Егоровнаны утумнаан оҕо эрдэҕиттэн ырыа-тойук аргыстанан улааппыта. Бастаан «Күн сардаҥата» диэн Лена Егорова салайааччылаах оҕо образцовай ансаамбылыгар сылдьыбыта. Онтон алтыс кылаастан сахалыы ырыаны-тойугу, олоҥхону сэҥээрэрин бэлиэтии көрөн Саха Өрөспүүбүлүкэтин үтүөлээх учуутала Никандр Тимофеев саха ырыатын-тойугун кэрэ абылаҥар уһуйбута.

Салгыы, оскуоланы бүтэрээт, М.Н.Жирков аатынан музыкальнай колледжка Саха Республикатын культуратын туйгуна Элеонора Соколова салайааччылаах төрүт культура салаатыгар киирбитэ. Айсиэн Сүөдэрэп үөрэммитин-уһуйуллубутун тухары үгүс-элбэх ситиһиилэрдээх, өрөспүүбүлүкэ иһинэн ыытыллар фольклорнай, олоҥхо фестивалларын кыайыылааҕа, 2011 c. Cаха Республикатын күннэригэр Башкортостаҥҥа Уфа куоракка кыттыбыта, ол сыл Красноярскай кыраайга буолбут «Саянское кольцо», 2013 c. «Эпосы в мире потомков Джанара» норуоттар икки ардыларынааҕы фестиваллар дипломаннарынан буолбута. Билигин бэйэтин талаанынан, дьоҕурунан салайтаран Өксөкүлээх Өлөксөй аатынан норуоттар доҕордоһууларын дьиэтигэр «Тойук» народнай бөлөх салайааччытынан үлэлиир, ону таһынан дьоһун-мааны ыал амарах аҕата, кэргэнинээн Мариялыын инники кэскиллэрин кэрэһилиир Арчын диэн уол оҕолоохтор.

Айсиэн Сүөдэрэп «Уолан уол тойуга» айар киэһэтин алгысчыт Валентин Исаков алҕаан арыйда. Ол кэннэ уолан уолбут ураты кылыһахтаах куолаһынан Николай Бурнашев-Бөөдөс «Кыыс Дэбилийэ» олоҥхотуттан быһа тардыыны толорон, көрөөччүлэр сүргэлэрин көтөхтө. Салгыы бииртэн биир чаҕылхай артыыстар сахалыы уран тылынан хоһоон аахтылар, норуот ырыатын тиһиликтэрин ыллаатылар-туойдулар, сахалыы имигэс үҥкүүлэри бэлэхтээтилэр. Айсиэн бэйэтэ бу киэһэ бииргэ үөрэнэр оҕолорун кытта Христофор Максимов ырыаларыгар, «Дьөһөгөй» норуот ырыаларыттан тиһиликтэри, ол кэннэ соҕотох С.А.Зверев «Сассын, сассын сассыарда», А.А.Иванов-Күндэ «Сайын», «Чэмэлиинэ”, “Ахтылҕан айан” ырыалары, И.Е.Слепцов-Арбита «Сайын» тойугун, А.И.Софронов-Алампа «Билгэ» уус-уран ааҕыыны, онтон тапталлаах кэргэнинээн Мария Никифоровалыын «Билинии» диэн урукку уостан түспэт ырыаны толорон дьон-сэргэ хайҕабылын ылыан ылла.

Айсиэн Сүөдэрэп кыырайар кырыымпа кылыһахтаах ырыаны, кутуллар дорҕоонноох тойугу кэрэхситэр кэрэ эриэккэс киэһэтэ дьон кутун тутта. Онон, киниэхэ инникитин даҕаны ураты талаана, дьикти дьоҕура киэҥник арылларыгар баҕа санаабытын этэбит.