ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Хабырыыс Ондороос

Кылыс уонна ыСКыыС туһунан кылгас баллада

12 сентября 2014, 11:22
(баллада)

Апатиянан сыдьаайар, араҥас өҥҥө бас бэриммит

Азия түҥ түгэҕэ...

Айыылар да умнубут,

Америка да тумнубут

Аччыгый, бүрэ,

Аччык куорат...

Кылыыны үктүүрү кэтэсиһэртэн

Кытааппыт олох

Кырдьыгын көрөөччү –

Кыахтаах, ол аата –

Кылыстаах уонна ыС-Кы-ыСтаах

Кырбыйдар

Кырыктаах уонна кырасыабай үйэлэрэ...

 

Бар, түүҥҥү клуб, хараҥа уулусса...

Баар уонна суох

Бары проблемалары быһаараллар

Пароллааҕар ордук күүстээх

Платиновай нүөмэрдэр

Уонна

Улахан убайдар

Удурҕаччылаах суолу тэлбит

Хас эмэ хос дэгэттээх

Харыс ааттара...

 

Күнүс

Күлүктэр аа-дьуо сынар,

Түүнүн эрэ

Түрбүөннээх түһүлгэлэрдэнэр,

Киһини тыыннаахтыы

Киргэ-хоххо оборон ылан

Аатын-суолун умуннарар

Адьынаттаах кэнэн куорат үрдүнэн

Анысхан тыал,

Ардах аҥала былыта,

Ала суор эрэ элиэтииллэр...

 

Чуумпуттан туһалааҕы арааран истэр

Чуор кулгаахтаахтар

Чуҥнаабыт чахчыларынан,

Биир эр бэрдэ

Биригээдэ

Бинтиэпкэлээх уонна биилээхтээх бэргэттэрин

Ыырдарын быһа түспүт сураҕа

Ыраас халлааҥҥа

Этиҥ эппитинээҕэр

Эпотажнайдык иһиллибитэ!

 

...Дьөһөгөй Айыы

Дьылҕа Тойоҥҥо

Хаартылаан сүүйтэрбитэ үһү

Хайаны дабайыахтаах

Хардааччы Мохсоҕол

Хаарыаннаах олоҕун...

 

...Кырыы

Кыбаартал

Кыараҕас уонна

Хараҥа уулуссаларынан

Хахайдыы хорсуннук сананан

Харизматичнайдык хаамар

Хара тирии плащ

Хахтаах

Хардааччы Мохсоҕол...

 

Бөрөлөргө, оннооҕор,

Бөртөлөөхтөрө эрэ

Бас-көс буолар –

Барарга-кэлэргэ суол тыырар аналлаах...

Мөкүтүн, бүрэтин да иһин,

Мегаполис чыыннаах

Сүүтүк саҕа куорат

Сүһүрдүллүбүт салгынынан

Көҥүллүк тыынар туһугар

Көхсүгүн хаххалыыр

Халыҥ уонна хаҥыл

Хамаанда наадата

Хара тураах

Хаһан да маҥхайбатыныы чахчы этэ.

 

Баатыр өбүгэлэриттэн бэриллибит

Баардааҕар уонна

Баардыгар экчи эрэнэн

Батаһа, бэстилиэтэ да суох,

Бардамнык уонна көнө сүрүннээхтик

Суолун тэлэр

Сутуруктаах сулус

Үрүҥ өҥнөөх тимир соноҕоһо

Үҥкүү түһүлгэтин тохтобулугар

Үнтү түспүтэ, муустан халты тэбинэн,

Үрдүлэринэн үрүҥ чыычаах көппөтөҕө

Үс сүүс үйэ буолбут

Алмазнай авторитеттар

Ахсым көлөлөрүн...

 

Адьарайдар уонна добун боотур

Алтыһыыларын

Аҥар кулгааҕын уһугунан истибити

Аар-саарга күнүстэри да тымтыктанан булар уустук...

Арай,

Аалай өҥнөммүт хаарга ыһыллыбыт

Алта көмүс тиис,

Быстыбыты тылы санатар кыһыл хаалтыс

Быһаҕаһа

Быһаарсыы

Быыппастар быччыҥ уонна

Быһах куоталаһыытыгар кубулуйбутун кэрэһилиирэ!

 

...Аччыгый куораты

Атыйахтаах уулуу аймаан,

Улук уутуттан

Уон хонукка уһугуннаран ааспыт

Силлиэлээх күннэр уонна

Сиэсиһиилээх түүннэр кэннилэриттэн

Суоһар чуумпу сатыылаабыта –

Сутурук да суулуу тутуллара

Сулуута-энньэтэ суох түмүктэммэт буолбута...

 

Эрэйгэ-буруйга ананан төрөөбүт

Эр соҕотох –

Хоһуун өбүгэлэринии,

Хоҥоруута туртайыан иннинэ,

Тэлэбиисэр сэһэнинэн,

Тэллэҕин булуммута этэ –

Алмазнай авторитеттар

Аччык овчарканы санатар

Аччыгый бырааттарын – үс бөтөһү

Аннараа дойдуга атаарыы

Атыыр мамыыҥката куораты кууспута...

 

Түүнүктээх түрмэ, хараҥа хаайыы...

Түүрүллүбүт материк

Түгэҕэр сөҥмүт,

Криминал, коррупция, мафия

Кирпииччэлэриттэн тутуллубут

Кирдээх-хохтоох куорат

Алмазнай

Авторитеттаах

Адьырҕаларын

Аһылыга буолбутун билбэтэх

Акаары караакы туһунан

Аһымала суох аҕыйах тылы

Арыгылаах сандалы номоҕо оҥостуу...

 

Күөл ньамаҕын санатар

Күөх кумааҕылар

Тэмэлдьигэн кынатыныы

Тэлибирии көтөр үөрдэригэр

Хараҥаран

Хатыйсыы, хабарҕалаһыы, хам баттаһыы...

Нууччаҕын хараҕын уута

Нуой мотуогунуу

Кыра куораты ыйыстыбыта

Кылабычыйар көстөр таас нөҥүө...

Удурҕаччылар

Уһуйааннарын

Ууһаарыллыбыттар

Уһун субурҕалара –

Улахаттар, улуулар, генийдэр...

 

Просмотров: 1802 Комментариев: 1 Автор: Хабырыыс Ондороос
Стиль и орфография автора сохранены.
Мнение автора может не совпадать с мнением редакции.

Комментарии Добавить комментарий

Чокуур Гаврильев 12 сентября 2014, 15:47 Ответить
1
Салгыыта наада эбит... -)
Вы не можете оставить комментарий, пока не войдете в систему. Вход / Регистрация
Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ