Хабырыыс Ондороос
Бүгүн Төрөөбүт тыл уонна сурук-бичик күнэ... Саха тыллаах хаһааҥҥыттан ыла бу иччилээх, илбистээх, имэҥнээх, иэйиилээх, истиҥ тылынан саҥарар, санаатын сайа этэр, сата баһын хамсатар буолбута эбитэ буолла? Чопчу хардарар, бигэргэтэр, быһаарар кыах суох. Арай кыраман үйэлэр уҥуордарыгар Омоҕой Баай уонна Эллэй Боотур кэмнэригэр эбитэ буолуо диэн боҕудьулуу саныыбын.
Туоҕа да суох буолларбын –
Дуоҕабын ыһыктыбатаҕым,
Тобукпар диэри
Толук буолбут уҥуохтары кэһэн
Торуттуу толоонун
Туораабытым,
Тулуйбутум уонна уйбутум…
Хаанын тохторбокко эрэ өлбүт
Хааным,
Халаанныы нимси үктээн киирэн
Харах ыларын тухары тэлгэммит
Хадаар сэрии
Хара сис нөҥүө
Хараллыбакка хаалбыттара…
Үтүмэннэр үөрэҕэстэнэн бүппүт,
Үгүстэр
Үрүҥ тыыннара быстыбыт,
Үөрдэр эрэ
Үөр-сүүрүк тардыһар
Дьулаан дойдуларыттан
Дьулурҕатык чугуйбутум…
Туоҕа да суох хаалбыт
Тутук боотур –
Киһиттэн – киибэскэ кубулуйан
Кириэстэри туруорбутум,
Кэпсэммэт
Кэриэс кэһиини
Хоонньубар уктан
Хобо куйаардарын уҥуордаабытым…
Дуоҕалаах уонна
Туоҕа да суох
Турар бэйэм
Тусаһабар эргиллэн
Өспүт холумтаннардаах
Өлбүт өтөхтөргө
Өссө өнөр кутаалары
Күлүбүрэччи умаппытым,
Күн эргиирин салҕаабытым…
…Эрэйи-буруйу
Эҥэринэн тэлбит
Эр соҕотох Эллэй Боотур диэн,
Эһиги, сүрэхтээбит эһэҕит
Эргэ, хаан өппүт дуоҕабын
Эркиммэр тиирэ тардыбытым:
«Эр уонна Эл, ол аата –
Эрэл!..» диэн кэриэс хаалларбытым!
Стиль и орфография автора сохранены.
Мнение автора может не совпадать с мнением редакции.
Мнение автора может не совпадать с мнением редакции.
Комментарии
Авторизация на сайте через социальные сети