Ынгын нэһилиэгэр өрүс уута содула суох ааһарыгар анаммыт мунньах буолла. Хамыыһыйа быһаарбытынан, манна эрдэттэн үлэ барбатах. Алдаҥҥа муус халыҥа 80-85 см. Ити былырыыҥҥыны кытта тэҥнээтэххэ, миэтэрэ аҥаарынан кыра. Манна уонна Хаандыга таһыгар муус ыам ыйын 10 күнүгэр аһыллыаҕа.

Нэһилиэккэ бүгүҥҥү ааҕыынан 425 киһи олорор. Онтон 20 инбэлиит, 1 сытар ыарыһах, 11 кырдьаҕас дьон. Ыксаллаах быһыы-майгы үөскээтэҕинэ, нэһилиэк оройуон кииниттэн быстан хаалар. Онон бу дьону эрдэттэн оройуон киин балыыһатыгар илдьэр наадата тириир. Атыттар ыксал буоллаҕына, быстах кэмнээх пууннарга тиийиэхтээхтэр. Дьон эрдэттэн малын-салын үрдүк сиргэ ууруохтаах, докумуоннары уонна үс күҥҥэ аһыыр астарын ылыахтаах.

Тыа хаһаайыстыбатын управлениетын начальнига Е. Андросов эппитинэн, сүөһүнү үүрэн таһаарар үс сири бэлэмнээбиттэр. Онно биир үөр сылгыны таһаарбыттар. Ону таһынан 12 тонна сенаһы таһаарбыттар. Нэһилиэнньэҕэ комбикорм толору кэлбит. 9 массыына, 15 аналлаах тиэхиньикэ, 37 киһи үлэлииргэ бэлэмнэр.

 Г. Герасимов баайы-дуолу страховкалыырга, пааспар-виза сулууспатыгар бары докумуоннары бэлэмнииргэ, эвакуациялыыр пууннар ыам ыйыгар диэри бэлэм буолалларыгар сорудахтаата

Өрүс уута барар кэмигэр Дьокуускайтан суһаллык дьайар бөлөх, МИ-8 вертолет үлэлиэхтэрэ. Пилота суох көтөр аппараат Алдан өрүскэ быһыы-майгы хайдаҕын көрө-истэ сылдьыаҕа. Муус харыыта таҕыста эрэ ол туһунан иһитиннэриэҕэ.

Ыксаллаах быһыыга-майгыга оройуоннааҕы хамыыһыйа председателэ Г. Герасимов, тыа хаһаайыстыбатын управлениетын начальнига Е. Андросов, пааспар-виза, старховка сулууспатын үлэһиттэрэ, Ынгын нэһилиэгин баһылыга И. Захаров, нэһилиэк тэрилтэлэрин салайааччылара мунньахха кытыннылар. Ыксаллаах быһыыга-майгыга оройуоннааҕы хамыыһыйа бэрэссэдээтэлин солбуйааччы А. Романенко сүрүн иһитиннэриини оҥордо.