Тыа хаһаайыстыбатын бу салаатыгар барыта табаны көрөр-истэр 241 биригээдэ баар. Манна 2060 киһи: 516 чуум үлэһитэ уонна 1544 табаһыт үлэлиир (2013 сыллаахха үлэлиир киһи ахсаана 1996 этэ).

Бу күннэргэ табалар күргүөмүнэн төрүүр-ууһуур кэмнэрэ. Ыйыллыбыт кэмҥэ барыта 5 102 тугут төрөөбүтэ бэлиэтэннэ. Урукку сыллары кытта тэҥнээтэххэ, бу — куһаҕана суох көрдөрүү.

Бу күннэргэ хаһаайыстыбалар табаһыттар биригээдэлэригэр анаан аһы-үөлү, малы-салы аҕаллылар. Туундара түөлбэтигэр уонна ыстаада сааскы-сайыҥҥы өттүгэр сылдьар хайысхаларыгар аһы-үөлү, малы-салы, маһы тиэрдэр сорук турар. Ыам ыйын бүтүүтэ, бэс ыйын саҥата таба муоһун эрбээһин саҕаланыаҕа. Сайын куйаас буолуо диэн сабаҕалааһын баарынан, биригээдэлэри үөнү-көйүүрү сууһарар препараттарынан хааччыйыахтара.