«Удачнай» биһиги дойдубутугар эрэ буолбакка, аан дойдуга алмааһы хостооһун сир аннынааҕы саамай бөдөҥ руднига. Эһиил промышленнай хостооһун саҕаланыаҕа. 2016 сылга 2,4-3 мөл тонна руданы,2019 сылга - 4 мөл. тоннаны хостуур соруктаах. Салгыы маннык тэтими ыһыктыбатаҕына, 2034 сылга 72 мөл. тахса тонна хостонуо. «Удачнай» кыаҕар тилэри киирдэҕинэ, сылга 5 мөл. тахса карат алмааһы биэриэн сөп.

Ол аата республика бюджетыгар нолуок киириитэ улаатар.

"Компанияттан киирэрэ дивиденд билиҥҥи кээмэйэ 2,6 млрд. солк. Ити барыта республика социальнай-экономическай сайдыытыгар ананар", – диэтэ АЛРОСА Кэтээн көрөр сэбиэтин чилиэнэ  Сергей Местников.

«Удачнай» аһыллыыта  Егор Борисов кыайыыта, ситиһиитэ.

Кини быһаччы кыттыытынан компанияны барытын буолбакка, сороҕун эрэ приватизациялаабыттара. АЛРОСА акциялара табыгастаахтык атыылананнар, Саха сирэ быһа холуйан, 18 млрд. солк. ылбыта. Ити үп-харчы саахалланар кутталлаах эргэ дьиэлэри көтүрүүгэ, социальнай эбийиэктэри тутууга, инфраструктураны сайыннарыыга ыытыллыбыта.

«Удачнай» АЛРОСА сир аннынааҕы төрдүс руднига аһыллыбыта тыһыынчанан үлэ миэстэтин республикаҕа таһаарыаҕа.

АЛРОСА компания президенэ  Федор Андреев этэринэн, «Удачнай» уонна «Севералмаз» баайдаах икки сир компания инникитигэр сүрүн олугу ууруохтара. 2020 сылга 40 мөлүйүөн каратка диэри тиэрдиллиэҕэ. Ити компания инники кирбиигэ буолуутун мэктиэлиэҕэ.

Егор Борисов рудник аһыллыытын бэлиэ түгэнинэн ааттаата.