«Хотугу сир кэрэ көстүүтэ» куонкуруска Оҕо художественнай оскуолаларын (искусство оскуолаларын художественнай кылаастарын) уонна араас көрүҥнээх художественнай студиялар үөрэнээччилэрэ кытталлар. Куонкуруска А4 биитэр А3 кээмэйдээх кумааҕыга, хортуоҥҥа, холустаҕа хайа баҕарар  жанрга, ханнык баҕарар  техниканан толоруллубут үлэлэр  ылыллаллар.

Оттон «Тулалыыр эйгэбитин ырааһырдыаҕыҥ!» плакат куонкуруһугар, художественнай оскуолаҕа үөрэнэриттэн-үөрэммэтиттэн тутулуга суох, 11 сааһыттан 18-гар диэри оҕолор кытталлар.

Фонда толорооччу директора Ольга Андросова этэринэн, бу куонкурустар  оҕо ойуулуур-дьүһүннүүр искусствоҕа үөрэҕириитин, кини айымньылаах үлэтин өйүүр,  экологическай билиилээх буоларга, тулалыыр эйгэҕэ харыстабыллаах сыһыаҥҥа иитэр сыаллаах ыытыллаллар. Оҕолор төһө баҕарар үлэнэн кыттыахтарын сөп.

Кыайыылаахтар бэртээхэй бириистэри тутуохтара: электроннай кинигэ, смартфон, компактнай фотоаппарат, МП 3-плеер, боробуота суох наушник, онтон да атын оскуола оҕолоругар наадалаах гаджеттар. Бастыҥ үлэлэр социальнай рекламаҕа туһаныллыахтара, сурунааллары, кинигэлэри киэргэтиэхтэрэ дииллэр тэрийээччилэр.

«Тулалыыр эйгэбитин ырааһырдыаҕыҥ!» плакат-уруһуй куонкуруһугар тематикатыгар сөп түбэһэр араас ыҥырыылар, слоганнар туттуллуохтарын сөп. Холобура: «Киртитимэ!», «Ойуурбутун бөхтөн харыстыаҕыҥ!», «Ыраас тиэргэн – ыраас планета», «Бука бары – субуотунньукка!», о.д.а.

Плакат куонкуруһугар кумааҕыга, биитэр хортуоҥҥа  хайа баҕарар техниканан толоруллубут үлэ электроннай көрүҥэ, итиэннэ, компьютерга графическай дизайнынан оҥоһуллубут үлэлэр ылыллаллар. JPEG  биитэр GIF форматтарынан бэриллиэхтэрин сөп. Графическай файл кээмэйэ 3 мегабайтан тахсыбата ордук.

Куонкурус  туһунан балаһыанньаны толору «Саха-Азия оҕолоро» фонда официальнай сайтыгар булуоххут.  Быһаарыылары, консультациялары  sakha-asia@yandex.ru электроннай почтанан, биитэр 42-13-37; 42-20-90 телефоннарга эрийэн ылыахха сөп.

Уруһуйдар, плакаттар 2014 сыл бэс ыйын 16 күнүгэр диэри ылыллыахтара. Үлэлэр почтанан ыытыллаллар, биитэр «Саха-Азия оҕолоро» МДФ маннык аадырыска аҕалыллаллар: 677027 Дьокуускай к., Киров аат. уулусса, 18,  В блок, 702 каб.

Оттон кыайыылаахтарга наҕараадалары туттарыы күһүн балаҕан ыйыгар, Дьокуускай Куорат күнүгэр  үөрүүлээх быһыыга-майгыга ыытыллыаҕа.