Барыта 175 мас дьиэ көтүрүллүөҕэ

Бу кыбаарталларга икки мэндиэмэннээх 175 мас дьиэ баарыттан 17-тэ көтүрүү бырагырааматыгар хапсыбыт. Онтон 158 дьиэни «Джода» компания бэйэтин үбүнэн көтүттэриэҕэ.

Бүгүҥҥү күҥҥэ үс кыбаарталга ыраас учаастактары булбуттар. Ол курдук, Якутскай уулусса 43-гэр, 67-гэр уонна Космонавтар уулуссаларын 19-гар баар ырааһыйаларга 92 квартиралаах 9-туу мэндиэмэннээх (3000 кв. м) дьиэлэри тутарга былааннаабыттар. Бу саҥа дьиэлэргэ олохтоохтор көһөн, эргэ дьиэлэрин босхолуохтаахтар. Оччоҕуна ол дьиэлэрэ көтөрүллэн, саҥа учаастак үөскүүр. Үс сиринэн үс дьиэ тутуутун биирдэ тэрийэр көдьүүстээҕэ чуолкай.

Саахалланар туруктаахтар испииһэктэригэр киирбит 17 дьиэ сорох олохтоохторун федеральнай бырагырааманан 47-с кыбартаалга тутулла турар дьиэлэргэ көһөрүөхтэрэ. Кытай компанията дьиэлэри эрэ тутуоҕа. Оттон уу, уот, гаас ситимин тардыыны Дьокуускай куорат дьаһалтата сүрүннүөҕэ.

 Бырайыагы олохтоох компания оҥорор

Дьиэ бырайыагын «Якутпроект» ААУо бэлэмнии сылдьар. Кытай архитектордара дуогабар түһэрсиитигэр кэлэ сылдьан, бэйэлэрин бырайыактарын көрдөрбүттэр. Бу сатаныан сөп эрээри, биһиги стандарпытыгар эппиэттэспэт, СНИП-кэ сөп түбэспэт эбит. Кинилэр бырайыактарын туһанар буоллахтарына, Россия тутуутун ирдэбилигэр түбэһэр гына көннөрөн биэриэхтэрэ. Быйыл муус устар саҥатыгар градостроительнай сэбиэккэ 2-с, 4-с, 17-с кыбаарталлар тутууларын көрөр мунньахха итини барытын быһаарсыахтара.

Дьиэ үрдүгэ 50 м куоһарыа суохтаах

Куорат аэропордугар түһэр сөмөлүөт 17-с кыбаартал үрдүнэн ааһар. Ирдэбил быһыытынан сөмөлүөт көтөн тахсар уонна түһэр балаһатыгар баар дьиэлэр үрдүктэрэ 50 м куоһарыа суохтаах. 16-18 мэндиэмэннээх дьиэ үрдүгэ 50 м буолар. Бырайыак быһыытынан саамай үрдүк дьиэ 12 мэндиэмэннээх буолар чинчилээх. Бу, баҕар, бэрэбиэркэни ааһыа суоҕун сөп. Бырайыагынан 7, 9, 12 мэндиэмэннээх 300 дьиэ тутуллуохтаах. «Дьокуускай» аэропорт специалистара оробуочай бөлөххө бааллар. Кинилэр этиилэрэ учуоттанар.

 Социальнай тэрилтэлэр

Саҥа кыбартаалга 550 миэстэлээх оскуола уонна 240 миэстэлээх икки оҕо саада тутуллуохтара. «Меркурий» атыы-эргиэн дьиэтин бастакы бырайыагынан баанньык этэ. Ону Дьокуускай куорат дьаһалтата атыылаһан ылан, төттөрү бааннык оҥорорго былаанныыр. Үбэлэниитэ быһаарыллар.

Итини тэҥэ, Жорницкай уулуссаҕа, Окружной шоссеҕа өрөмүөн ыытыллыаҕа. Жорницкай уулусса уонна Окружной шоссе быһа охсуһууларыгар (перекрестокка) эргиир оҥоһуллуоҕа.

 Олохтоох компаниялар көмөлөһүөхтэрэ

Сантехниканы, ааннары, обуойдары Кытайтан аҕалыахтара. Оттон бетон матырыйаалы, биллэн турар, Дьокуускай компанияларыттан ылыахтара. Бастакы кэпсэтиинэн, сыбаайаны түһэриигэ олохтоох компаниялары кытыннарыахтаахтар диэн этэ. Ирбэт тоҥҥо үлэлээбэтэх дьон буоллахтара. Онтон атынын бэйэлэрэ оҥоруохтара.

Россия киин куораттарыгар Кытай компаниялара дьиэ туппуттара ыраатта. Онон уопуттаахтар. Аҕыйах сыллааҕыта Хабаровскай куоракка бүтүн кыбаарталы дьэндэтэн таһаарбыттара.