Литературнай мастарыскыайы Татьяна Сергучева салайар. Кини кэпсээбитинэн, манна биэнсийэҕэ олорор дьон мустан арыт айымньыны бииргэ ааҕаллар, сороҕор биир хоһоону, кэпсээни ырыталлар, санааларын үллэстэллэр. Суруйарга холонооччулар эмиэ бааллар.

Литература сылынан СИА тэрийбит акциятыгар кинилэр үөрүүнэн кытыннылар, сөбүлүүр поэттарын хоһоонун аахтылар. Дьокуускай куорат нэһилиэнньэтин социальнай өйөбүлгэ киинин директора Наталья Пахомова бэлиэтээбитинэн, аҕам саастаах дьон үксэ кинигэ ааҕарын олус сөбүлүүр.

-- СИА акциятын үөрүүнэн өйүүбүт уонна онно кыттыһан бүгүн литературнай мастарыскыайбыт көхтөөх кыттааччылара сөбүлүүр хоһооннорун ааҕалларыттан үөрэбит, кинилэринэн киэн туттабыт, -- диэтэ Наталья Николаевна.

Кини кэпсээбитинэн, Амма, Уус-Алдан, Мэҥэ-Хаҥалас улуустарыгар, Тулагы Киллэмҥэ уонна Табаҕаҕа маннык оскуолалар күн бүгүн ситиһиилээхтик үлэлииллэр. Өйү-санааны сааһылыыр, толкуйу сайыннарар куруһуоктарга кырдьаҕастар сөбүлээн сылдьаллар.