Куорат 2 №-дээх балыыһатын кылаабынай бырааһа Саргылаана Васильева иһитиннэрбитинэн, 12 куойкалаах саҥа стационарга терапевт-быраас ыарыһахтары көрүөҕэ. Икки сменаҕа 30-35 киһи сылдьыаҕа.

Ыраах сытар оройуоннарга уонна куорат таһынааҕы дэриэбинэлэргэ медицинскэй тэрилтэлэр салааларын аһан үлэлэтии программата салгыы олоххо киллэриллэн, муниципальнай дьиэлэргэ өссө 3 салааны арыйыы, 2 фельдшерскэй-акушерскай пууну, түргэнник хомуллар 5 объегы, сытар куойкалардаах 2 учаастак балыыһатын тутуу былааннанар.

Кэлэр нэдиэлэҕэ куораттааҕы медицинскэй киин оройуонугар Кальвица 9/1 аадырыска уопсай практика бырааһын офиһа аанын арыйыаҕа. Министерство уонна куорат дьаһалтатын сөбүлэһиилэринэн, Дьокуускайга доруобуйа харыстабылын 10 объега, ол иһигэр 2015 сылга 3 объект аһыллара былааннанар.