Субу курдук интернет-куоластааһын нөҥүө Россия уопсастыбаннай палаататыгар киирэргэ кыах аан бастакытын үөскэтилиннэ. Манна көстүбүтүнэн, кыттар дьон ахсаана аҕыйаҕа суох. Бүгүҥҥү ааҕыынан кандидаттарга барыларыгар 1 мөл. 255 тыһ. куолас киирдэ. Онлайн-быыбардааччылар ахсааннара элбии, эбиллэ турар. Күҥҥэ ортотунан 30 тыһ. киһи куоластыыр.

Россия туһанааччыларын сойууһун (Союз потребителей России) бэрэстэбиитэлэ Владимир Слепак иһин 27 тыһ. тахса куолас киирбит. Кини кэнниттэн 23 тыһ. куоластаах Нижегородскай уобалас уопсастыбаннай тэрилтэтин бэрэстэбиитэлэ  Эдуард Гаврилов иһэр. Куттал суох буолуутун идэлээх сойуустарын чилиэнэДмитрий Галочкин үс бастыҥнар кэккэлэрин түмүктүүр.

Саха сириттэн Россия уопсастыбаннай палаататыгар үс кандидат: Петр Тумусов, Галина Васильева уонна  Александр Захаров киирбиттэрэ. Саха сирин предприниматель дьахталларын ассоциациятын президенэ Галина Васильева бэйэтин хайысхатыгар 142 куолаһы ылан 10 миэстэҕэ иһэр. Норуот хонтуруолун кэмитиэтин салайааччыта Александр Захаров «Уопсастыбаннай хонтуруолу сайыннарыы» салаатыгар 12 миэстэҕэ турар. Петр Тумусов «Доруобуйаны харыстааһын, чөл олоҕу тарҕатыы» хайысхаҕа 26 миэстэни ылар.

Биир регионтан үс киһи кыттара — куһаҕана суох көрдөрүү. Бу уопсастыбаннас актыыбынайын, көҕүн туоһулуур. Куоластааһын дааннайын ылан көрдөххө, баһылаан иһэр кандидаттар бары кэриэтэ бүтүн Россиятааҕы уопсастыбаннай хамсааһын бэрэстэбиитэллэрэ. Кинилэр эрдэттэн «барыстаах» уонна «сүүйүүлээх» балаһыанньалаахтар. Ити регионнар гиэннэрин кытта тэҥнээтэххэ.

Владимир Путин эрдэтээҕи уурааҕынан палаата 40 чилиэнин бигэргэппитэ, 83 Россия субъектарыттан киириэхтээхтэр. Саха сирин бэрэстэбиитэлэ Марина Богословская баҕар онно хапсан республика интэриэһин көмүскүөҕэ.