«Компания собуотугар технологическай процесс барыта тилэри толкуйдаммыт. Биир тэрилтэ базатыгар сырьеттан саҕалаан ювелирнай киэргэлгэ тиийэ производство бары көрүҥэ оҥоһуллар», - диэтэ Андрей Панов.

Промышленность миниистирэ уонна кини солбуйааччыта Максим Бульший тэрилтэ үлэтин кытта ыкса, бэрт кыра ымпыгар-чымпыгар тиийэ билистилэр.

«Саха сирин алмааһын компанията» ( YDC) бриллианы уонна маннык таастаах ювелирнай киэргэллэри оҥорон таһаарар. Хас төрдүс бриллиант манна кырыыланар. YDC компания «АЛРОСА» АК бөдөҥ клиеннэрин ахсааныгар киирсэр.

«Мин компанияны арыйарбар үлэҕэ уопуттаах, элбэх толкуйдаах кэлбитим», - диэн СИА-ҕа эттэ компания генеральнай дириэктэрэ  Александр Максимов.

Розничнай атыы кэҥииригэр компания билигин күүрүүлээхтик үлэлиир. «Ситиспит кирбиибитин бөҕөргөтөр соруктаахпыт. Ырыынакка бэйэбит миэстэбитин бигэтик буллубут. Бүгүҥҥү ааҕыынан 20 маҕаһыыннаахпыт. Барыта санаабыт, баҕарбыт хоту буоллаҕына, бу сыл бүтүөр диэри маҕаһыыммыт ахсаанын 30 диэри тиэрдиэхпит», - диэтэ А. Максимов.

Компания сыллааҕы эргиирэ 3 млрд. солк. куоһарар. «Быйыл ити көрдөрүүнү 4,5 млрд солк. диэри улаатыннарыахпыт. Саамай сүрүнэ — ювелирнай оҥоһук сыаната, хаачыстыбата уонна быһыыта түргэн тэтимнээхтик уларыйа турар кэм ирдэбилигэр сөп түбэһэн иһиэхтээх», - диэтэ генеральнай дириэктэр.