«Быыстапка саҕаланаатын кытта тута дьон биһирэбилин ылыан ылла. Кэлиҥни сылларга дьон өбүгэлэрбит былыргы таҥастарыгар-саптарыгар тардыһар уонна онно майгыннатан таҥна сатыыр буолла», - диэтэ тэрийээччи «Сахапрезент» ХЭТ дириэктэрэ Светлана Иванова.

«Сахапрезент» үлэһиттэрэ былырыын маннык быыстапканы ыытар туһунан быһаарыы ылыммыттар. Бастаан утаа дьонтон сакаас ыларга Дьокуускай ательеларын уонна Нам, Амма, Хаҥалас, о.д.а. үөс сиртэн чугас улуустар иистэҥнэрин ыҥырбыттар. Онно олус элбэх киһи кэлбит, ыһыах маанылаах таҥаһын кинилэр хото атыыласпыттарын туһунан кини эттэ. Быйылгы быыстапкаҕа Сунтаартан, Ньурбаттан, бэл, ыраах Муома улууһуттан кытта кэлбиттэр.

Амма суолугар күчүмэҕэй үөскээбитинэн ус кыһыны быһа коллекцияларын атыыга анаан бэлэмнээбит дьон кыайан кэлбэккэ хаалбыттар. Суол быстыбытыттан сылтаан быыстапка хабар иэнэ, георгафията кыараабыт.

«Кружало» атыы-эргиэн эрээттэригэр киирээти кытта сахалыы сиэдэрэй симэх, мал-сал, дьэрэкээн таҥас арааһын, эгэлгэтин ортотугар буола түһэҕин. Сахалыы оһуордаах таҥас матырыйаалын, иистэнэр малы атыылыыр маҕаһыыннар дьаарбаҥкаҕа бааллар.