Манна тарбахтарыгар талааннаахтар илиинэн оҥорбут араас оҥоһуктарын, саха национальнай таҥастарын дьон дьүүлүгэр таһаардылар. Быыстапка кыттыылаахтара кэлбит дьону алаадьынан, итии чэйинэн буор босхо күндүлүүллэр. Күнүстэн киэһэ муода театра сахалыы таҥас эгэлгэтин көрдөрдө. Күнү быһа сүүйтэриитэ суох лотерея үлэлиир, саха эстрадатын артыыстара куорат олохтоохторун уонна ыалдьыттарын самаан сайын кэлбитинэн эҕэрдэлииллэр.

"Сахалыы таҥас" общественнай коммерческайа суох тэрилтэ маннык быыстапкалары ыһыах иннинэ анаан тэрийэр. Икки сыллааҕыта тэриллибит тэрилтэ былырыын ахсынньыга официальнай регистрацияны ааспыт. "60-ча чилиэннээхпит. Оттон ыытар тэрээһиннэрбитигэр 6 тыһыынча киһи кыттар", - диэн кэпсиир "Сахалыы таҥас" общественнай тэрилтэ салайааччыта Ньургуйаана Борисова.

Тааттаттан төрүттээх норуот маастара Михаил Захаров дэйбиир уонна харысхал оҥорон атыылыыр. Үксүгэр сакааска оҥорор эбит.

- Куоракка ыытыллар быыстапкаҕа өрүү кыттабын. Сиэннэрим оскуоланы бүтэрэллэрин кэтэһэ сылдьабын. Үөрэнэн бүттүлэр эрэ, бэс ыйын саҥатыгар дойдулаары сылдьабын, - диэн санаатын үллэстэр Михаил Николаевич.

Любовь Слепцова эдьиийинээн Оксана Ивановалыын национальнай истииллээх клатчтары уонна суумкалары сакааска тигэ сылдьан, улам ылларан барбыттар, хобби оҥостубуттар. Кыргыттар маннык быыстапкаларга сылдьан оҥоһуктарын хамаҕатык батараллар. Маны таһынан кинилэр сахалыы саҥарар куукулалары оҥороллор эбит.

- Бу тэрээһини ватсаптан билэн Нам Бартыһааныттан кэллибит. Узбекистантан ыалдьыттыы сылдьар балтыбар быыстапканы анаан көрдөрө сылдьабын, -- диэн кэпсиир Ольга Чупрова.

-- Мин Светлана Уламовабын. 1984 сылтан Узбекистаҥҥа ыал буолан олоробун. Орто Азия киин өрөспүүбүлүкэтигэр национальнай култуураны сайыннарар араас быыстапка буолар. Бу тэрээһин эмиэ онно майгынныыр эбит. Онон маннык быыстапкалар өбүгэ үгэһин сөргүтэргэ олус наадалар, - диэн санаатын үллэһиннэ биир дойдулаахпыт Узбекистан олохтооҕо.

"Өбүгэ үгэһин сөргүтэн"эрээһин ити курдук бэрт үгүс саха таҥаһын уонна оҥоһуктарын интэриэһиргээччилэри муста.