Саха сирин артыыстара икки бөлөххө хайдыстылар. Бастакы бөлөххө «Режиссер үлэтигэр сиэри-туому туһаныы» диэн ис хоһоонноох семинары Степанида Борисова ыытта, иккис бөлөххө театр кириитигэ М.Дмитревская «Хаарыан хампа күөх кытылым» испиктээкили ырытта.

 Степанида Борисова ыыппыт семинарыгар Арҕаа Казахстан драматическай, сатира Буинскайдааҕы, Набережные челны драматическай, Казахстаннааҕы Ш.Хусаинов аатынан драматическай, о.д.а. театрдар, студеннар сырыттылар. Семинар маастар-кылааска кубулуйда. С.Борисова Японияҕа кабуки уонна но театрдарыгар стажеровкаҕа сылдьыбыттарын, онно тугу көрбүттэри-билбиттэрин туһунан кэпсээтэ. Ону таһынан кини ойууннар, удаҕаннар кистэлэҥнэрин, абыычайдарын, сиэрдэрин-туомнарын сүһэн ылан мустубут дьоҥҥо арыйда.

Артыыс Петр Баснаев ойуун таҥаһын-сабын, малын-салын көрдөрдө. Степанида Борисова уонна  Матрена Корнилова көстүү туһунан сиһилии кэпсээтилэр. Семинарга сылдьыбыт дьон олус биһирээтилэр, элбэҕи туоһуластылар.