ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Похожие новости

2 июня 2015, 17:59

Саха театра «Науруз» фестивальга кытта барда


Бэс ыйын 1-5 күннэригэр Казань куоракка «Науруз» түүр тыллаах норуоттар аан дойдутааҕы театральнай фестиваллара уон иккис төгүл ыытыллар.

photoByWidth&id=35541&width=1000

Бу сылын аайы ыытыллар фестивальга 2010 сыллаахха Степанида Борисова «Медея» моноспектаклынан, оттон былырыын Олоҥхо театра «Удаҕан кыргыттар» испэктээкилинэн ыҥырыллан сылдьыбыт буоллахтарына, быйыл Саха театра кыттыыны ылар. Онон фестиваль түһүлгэтигэр мустубут түүр тыллаах театральнай эйгэ режиссер Сергей Потапов туруорбут У. Шекспир «Тиит» испэктээкилин көрүөҕэ. Бу иннинэ Саха театра «Хаарыан хампа күөх кытылым» испэктээкилинэн күндү ыалдьыт быһыытынан ыҥырыллан сылдьыбыта.

«Науруз» фестиваль сылын аайы түүр тыллаах омуктар театрдарын ыҥырарын таһынан тас дойдулартан театры үөрэтээччилэри эмиэ хото ыҥырар. Быйылгы фестивальга Казахстан, Киргизия, Турция, Горнай Алтай, Чувашия, Узбекистан, Азербайджан, Башкирия театрдара кыттыыны ылыахтара. Маны сэргэ Крым, Набережнай Челны, Альметьевск татардарын театрдара ыҥырылыннылар. Оттон бэс ыйын 5 күнүгэр буолар «Вектор развития театра: Европа-Азия» диэн ааттаах аан дойдутааҕы научнай-практическай конференцияҕа Германия, Швеция, Венгрия учуонайдара, театры үөрэтээччилэрэ кыттыахтара.

Бүгүн, бэс ыйын 2 күнүгэр, 25 киһилээх Саха театрын труппата Казаньҥа көттө уонна сарсын К.Тинчурин аатынан драма уонна комедия государственнай театрыгар испэктээкилин көрдөрүөҕэ.

photoByWidth&id=35542&width=1000

«Науруз» атын театр фестивалларынааҕар үгүс уратылардаах. Ол курдук испэктээкиллэри көрүү буолбутун кэнниттэн кэлэр сылга театральнай форум ыытыллар эбит. Ити форумҥа араас лекциялары, конференциялары, көрсүһүүлэри сэргэ сцена маастардарын үөрэхтэрэ ыытыллара үгэскэ кубулуйбут. Биллиилээх театроведтар, театр кириитиктэрэ, режиссердар бэйэлэрин үлэлэринэн маастар кылаастары ыыталлар. Саха сириттэн Андрей Борисов итинник форумҥа маастар кылаас ыытан турар. Аны испэктээкил көрдөрөр сылларын биир эмит түүр тыллаах дойду культуратыгар уонна искусствотыгар аныыр үтүө үгэстээхтэр эбит. Ол курдук, быйылгы фестиваль Казахстан культуратыгар уонна искусствотыгар ананар. Онон Казахстантан элбэх театр уонна культура тэрилтэлэрэ кыттыыны ылаллар. Онтон 2017 сылга ыытыллар «Науруз» фестиваль Саха сиригэр ананар. Онон бу фестивальга эстафета кубогын Саха Республикатын делегациятыгар туттарыахтаахтар. Ити культура уонна духуобунай сайдыы миниистирин солбуйааччы Н.А.Макаров салайааччылаах делегация састаабыгар республика театрдарын дириэктэрдэрэ киирэн эмиэ фестивальга кыттыахтара.

Бу фестивальга Саха театрын «Тиит» испэктээкилэ бүтүн түүр омук дьүүлүгэр тахсар дьоһуннаах, эппиэтинэстээх түгэнэ буолар. Онон театр труппатыгар уруулуу омуктарбыт киэҥ сэҥээриилэрин, дириҥ болҕомтолорун, сүрэхтэринэн-быардарынан ылынныннар, үрдүк билиниини, ыллыннар, улахан ситиһиилэрэ махталлаах көрөөччү дохсун ытыс тыаһынан доҕуһуолланнын диэн алгыы хаалыахха.

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 534 Источник: ЯСИА Автор: Надежда Осипова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ