Афанасий Семенович, Ыччат ыһыаҕын сүрүн идеята, суолтата тугуй?

​ Бастатан туран, төрүт үгэһи, культураны, сиэри-туому билии, тутуһуу буолар. Саха сирэ киэҥ нэлэмэн сиринэн тэлэһийэр ыччат манна кэлэн билсэр, сомоҕолоһор. Маны таһынан, ыччаты көҕүлүүр, сырдыкка-кэрэҕэ сирдиир сүрүн тэрээһиннэртэн биирдэстэрэ буолар. Ыччат ыһыаҕын историятын саҕахтарын сэгэтэн көрдөххө, сыл аайы республика бары улуустарыттан уонна ситэриилээх былаас уорганнарыттан тыһыынчанан киһи кыттар. Сыл аайы ураты культурнай куонкурустардаах, спортивнай оонньуулардаах буолар. Холобур, Ньурбаҕа буолбут ыһыахха 7 спортивнай күрэхтэһии уонна 13 куонкурус ыытыллыбыта.

​ Бүлүү ыһыаҕа туох уратылаах буолуой?

​ Кырдьаҕас Бүлүү куорат 380 сыллаах үбүлүөйдээх тэрээһиннэрин кытта тэҥҥэ ыытыллар. Бу ыһыахха үс сорук турар: историяны ытыгылааһын, сиэри-туому тутуһуу, ыччакка төрүт культураны тиэрдии, иҥэрии. Маны таһынан, ыһыах быйылгы Арктика сылыгар ананар. Онон хоту улуустарга туспа бириис – УАЗ массыына туруоҕа.

​ Ыһыах үбэ-харчыта төһөнүй, хантан тыырыллан кэлэрий?

​ Үп-харчы үс хайысханан тыырыллар. Ол курдук, министерствоттан, Бүлүү оройуонуттан уонна спронсордар көмөлөрүнэн. Ыччат министерствотыттан бу тэрээһиҥҥэ 2 мөл. солкуобайтан тахса көрүлүннэ. Бириистэргэ 800 тыһ. солк., дьону таһыыга 800 тыһ.солк., ыһыах аһыллыытыгар, сабыллыытыгар 500 тыһ.солк. көрүлүннэ.

​ Тэрийэр улуус туох эбэһээтилистибэни ылынна?

​ Элбэх киһи биир сиргэ тоҕуоруһа мустара кутталлаах. Ол иһин бэрээдэги тутууга, аһылыкка, олохсуйууга, уотунан хааччыйыыга, сири-уоту дьаһайыыга, кумаартан ыраастыырга уонна да атыҥҥа улахан болҕомто ууруллар. Бүлүү улууһун дьаһалтатын кытта бэлэмнэнии үлэтэ билигин күүскэ барар.

​ Ыһыах ыалдьыттарын туох күүтэрий?

​ Ыалдьыттары Бүлүү куоратынан экскурсияҕа сырытыннарыахпыт. Онно куорат историятын билсиэхтэрэ. Хохочойго тохтоон сибэкки дьөрбөтүн ууруохпут, Сэбиэскэй Сойуус үс дьоруойугар ытык иэспитин төлүөхпүт. Ону таһынан, доҕордоһуу, сомоҕолоһуу аллеятын арыллыытын сиэригэр-туомугар кыттыахпыт.

​ Ыччат ыһыаҕын бары кыттааччыларыгар, ыалдьыттарыгар баҕа санааҥ.

​ Уһун томороон тымныы кыһыны этэҥҥэ туорааммыт күөх окко үктэммиппитинэн, самаан сайын салаллыбытынан, ыһыахтар саҕаламмыттарынан Саха сирин дьонугар-сэргэтигэр итии-истиҥ эҕэрдэ! Күүстээх үлэ иннинэ ыһыах ыһан, кымыс иһэн, күүс-уох иҥэриниэх!