1943 сыл тохсунньутугар 136-с стрелковай дивизия кыттыбыт Ленинграды блокадаттан босхолуур кырыктаах кыргыһыыта буолбут сиригэр көстүбүт уонна кинилэр кимнэрэ быһаарыллыбыт 12 саллаат аймахтара, чугас дьоно, «Морозовскайдааҕы куорат сэлиэнньэтэ» МТ баһылыга Денис Захаров, Санкт-Петербург куоракка Саха сирин бастайааннай бэрэстэбиитэлэ Галина Макарова, Аҕа дойду улуу сэриитин бэтэрээнэ, «Искра» кыттыылааҕа Владимир Молев, «Россия көрдүүр хамсааһына» уопсастыбаннай хамсааһын Ленинград регионнааҕы салаатын салайааччыта Валентина Боброва о.д.а. муһуннулар. Өлбүт саха буойуна Иннокентий Михайлович Никонов сиэнэ Сергей Никонов уонна аймаҕа Жанна Чамча кыыһынаан тэрээһиҥҥэ сырыттылар.
Саха Республикатын бастайааннай бэрэстэбиитэлэ Галина Макарова сэрии кэмигэр быстыбыт дьону көрдөөһүҥҥэ үлэлээбит дьоҥҥо улаханнык махтанна. Кэлиҥҥи үс сылга Ленинград уобалаһыгар Мэҥэ-Хаҥаластан төрүттээх буойун Игнатий Назарович Попов, Ньурбаттан Михаил Дмириревич Бюргезев уҥуохтара көстүбүтүн, билигин Алдантан Константин Михайлович Попов уҥуоҕун көрдүүллэрин туһунан кини эттэ.
Ленинград уобалаһын Хара үрүйэтигэр «Искра» этэрээт 172 саллаат уҥуохтарын кырамталарын, кинилэр 12 медальоннарын булбуттар.
1910 сыллаахха төрөөбүт Иннокентий Михайлович Никонов өллөҕүнэ бэлиэ буолар медальонун кини сиэнигэр Сергей Никоновка туттардылар. И.М.Никонов 1943 сыл тохсунньутугар сырдык тыына быстыбыт.
Аан дойдуну көмүскүүр Улуу сэриигэ өлбүт буойуннары чиэстээн-бочуоттаан көмтүлэр. И.Никонов төрөөбүт дойдутуттан аҕалбыт сирдэрин дьоно кини уҥуоҕар куттулар.
Манна кэлбит дьон буойуннар уҥуохтарыгар тыыннаах сибэкки дьөрбөтүн уурдулар. Сибэкки ууруутугар Саха сириттэн тиийбит Нюргустана Пахомова кэм ситимин, саха буойуннарыгар анаммыт дьүһүйүүнү хомуска оонньоото. Эһиил бу сиргэ часовня тутуллара былааннанар.
Комментарии
Авторизация на сайте через социальные сети