Холобура, чурапчылар спортивнай кууркаларыгар “Чурапчы улууһа” диэн суруктаах буоллахтарына, Нерюнгри спортсменнарын кэтэ сылдьар футболкаларыгар улуустара уонна спортсмен аата чопчу сурулла сылдьар буолан, спорду таптааччылар кинилэри тута билэллэр: “Көр доо, били аатырбыт теннисистэрэ Нателла Касумовалара ити сылдьар дии”, -- дэһэллэр. Истэргэ үчүгэй баҕайы.

Улуустартан кэлбит VI Спортивнай оонньуулар кыттааччылара уонна ыалдьыттара спорт түһүлгэтин киининэн буолбут Нам улууһун туһунан туох санаалаахтарый?

Владимир Федурин, Ленскэй оройуонун официальнай делегациятын салайааччыта, оройуон спортка кэмитиэтин салайааччыта:

-- Биһиги делегациябытыгар спортсменныын, тренердиин, бэрэстэбиитэллиин, суоппардыын, уопсайа, 51 киһи буолан кэллибит. Спортсменнарбыт алта көрүҥҥэ: баскетболга, волейболга, мини-футболга (эр дьон), буулдьанан ытыыга, остуол тенниһигэр уонна чэпчэки атлетикаҕа кытталлар. Сүүмэрдиир этапка волейбол хамаандата инники күөҥҥэ тахсыбыта, теннисистэр үһүс миэстэҕэ тиксибиттэрэ. Биһиги сүрүннээн чэпчэки атлетикаҕа сүүрүктэрбитигэр Максим Овчаренкоҕа уонна Ольга Шкаленоваҕа эрэнэбит.

Намҥа “Урал” мааркалаах “вахтовканан” үс күн айаннаан кэллибит. Унньуктаах уһун айаҥҥа спортсменнарбыт күүстэрин эһимээри, “Восход” теплоходунан устан кэлэллэрин тэрийбиппит. Онон кинилэр 16 чаас усталаах айаннарыгар эрэйдэммэтилэр. Манна наһаа үчүгэйдик көрүстүлэр. Ып-ыраас “Кэнчээри” оҕо саадыгар түһэрдилэр, “Аргыс” кафеҕа аһаталлар. Онон делегациябыт дьоно спортивнай күрэхтэһиилэр тэрээһиннэрэ үрдүк таһымнааҕын бэлиэтииллэр. Нэһилиэктэргэ буолар күрэхтэһиилэргэ бэйэбит техникабытынан сылдьар буолан, турарга-олорорго табыгастаах, бары күрэхтэһиилэри кэтэспэккэ-манаспакка кэмиттэн кэмигэр көрө, кытта сылдьабыт.

Денис Данилов, Сунтаар улууһунааҕы спорт управлениетын салайааччыта:

-- Сүрүн эрэлбит – ытыы спорда: спортинг, буулдьанан уонна ох саанан ытыы. Дойдубутуттан биэс автобуһунан кэлбиппит. Улуустааҕы гимназияҕа түстүбүт. Күрэхтэһэргэ уонна сынньанарга усулуобуйабытын толору хааччыйдылар, дьиэбит таһыгар суунар душ кытта баар. “Тыас таһаарыахтара” диэн эрэнэр спортсменнарбыт – Николай Охлопков (тустуу), уонна Айаал Федоров (ох саанан ытыы).

Ити курдук, улуустартан кэлбит спортсменнар сүрүн соруктара, биллэн турар, кыайыы. Онон бачча ыраахтан айаннаан кэлбит дьон олус баҕарар кыайыыларын сырдык дьарылыга кинилэри ыга да ыга куустаҕа буоллун!