Вице-премьер Александр Хлопонин субъет сирэ-уота аһара улаханынан, уот турбут ыраах, тэйиччи сирдэргэ тиийэр уустугун иһин үп-харчы боппуруоһугар өрөспүүбүлүкэ салалтата  догуйарын өйдүүрүн уонна өйүүрүн туһунан эттэ.

СӨ бырабыыталыстыбатын бэрэссэдээтэлин солбуйааччы Анатолий Скрыбыкин баһаары тохтотууга баар кыһалҕа туһунан аһаҕастык эттэ. 2013 сыллаахха турбут уоту умуруорууга туһаныллыбыт 77 мөл.солк. кээмэйдээх кредит иэһин төлөөһүн, баһаарынай сулууспа федеральнай резервэтиттэн 50 парашютиһы, десантнигы эбии ыытыы, 150 мөл.солк. ойуур баһаардарыгар авиацияны үлэлэтиигэ туттулларын, ойуурга баһаар кутталын үөрэтии, о.д.а. боппуростары таарыйда.

РФ-ҕа баар нуорма, быраап аакталарыгар олоҕуран ойуур сыһыаннаһыыларыгар субвенцияны ааҕарга аналлаах быһаарыылары түргэтэтэр наадалааҕын ыйда.

Анатолий Скрыбыкин 2014 сылга ойуур баһаарын умуруорар анал тиэхиньикэни атыылаһыыга баара эрэ 4,7 мөл.солк., эһиил эмиэ оруобуна бачча үп-харчы бэриллэрэ ситэтэ суоҕун ыйда. 2016 сылга эрэ маныаха ананар үп-харчы кээмэйэ 13,5 мөл солк. диэри улаатыахтаах. Онон, А.Скрыбыкин А.Хлопонин РФ айылҕа ресурсатын уонна экология министиэристибэтигэр субвенция кээмэйин улаатыннарарга сорудахтыырын туруоруста. Онуоха рекреационнай ноҕурууска аахсыллыахтааҕын эбэн эттэ.