Жатайга от ыйын 10 күнүгэр буолбут мунньахха республика баһылыгын эбээһинэһин быстах кэмҥэ толорооччу Егор Борисов, ДьКХ реформалааһыҥҥа көмөлөһөр фонда салайааччыта Константин Цицин уонна бу фонда кэтээн көрөр сэбиэтин бэрэссэдээтэлэ Сергей Степашин кытыннылар.

«2012 сыл тохсунньу 1 күнүнээҕи туругунан эргэ, саахалланар кутталлаах олорор дьиэ уопсай фондата 466 тыһ. кв. м. этэ. Эргэ дьиэлэри көтүрүүгэ уонна дьону саҥа дьиэҕэ көһөрүүгэ 287 млрд.солк. наада. 2013 сылга итиниэхэ 5,6 млрд солк. бэриллбитэ. Онон, 2,5 тыһыынча дьиэ кэргэн саҥа дьиэлэргэ көспүттэрэ. 96 тыһыынча кв.м иэннээх эргэ дьиэ көтүрүллүбүтэ», - диэтэ правительство бэрэссэдээтэлин солбуйааччы Павел Маринычев. 

Хапытаалынай өрөмүөн боппуруоһун кинилэр эмиэ дьүүллэстилэр.

Бырабыыталыстыба бэрэссэдээтэлин солбуйааччы федеральнай нуорма-быраап аакталарыгар, чуолаан Олорор дьиэ кодексыгар уларытыылары киллэрэр наадалааҕын эттэ. Салайар компанияларга ирдэбил улаатыахтааҕын кини ойуччу тутта.

Онуоха Сергей Степашин Дмитрий Козак аатыгар туһаайан этиини оҥорорго сүбэлээтэ.

«Бүгүҥҥү туругунан бырагыраама туолуута былаантан 25% ылар. Дьокуускай куоракка хаалыы баар», - диэтэ  Константин Цицин. 

Дьокуускай куорат баһылыгын солбуйааччы Игорь Никифоров быһаарыытын иһиттилэр уонна быһыы-майгы уларыйбатаҕын эттилэр. Лермонтов аатынан уулуссаҕа тутуллуохтаах дьиэҕэ эргэ, хаарбах дьиэлээх дьон көһүөхтээх этилэр. Итини Егор Борисов улаханнык сэмэлээтэ.

Түмүккэ Сергей Степашин регионнар үлэлэрин сыаналаан, ырытан көрөн баран Саха сиригэр 45,9 мөл.солк. төннөрүллүбэт төрүккэ биэрэр туһунан эттэ. «Бу үбү-харчыны сорук туолуутун иһин биэрэбит», - диэтэ Степашин.