Бастакы көрсүһүү оскуолаҕа ыытылынна. Саха сирин президенин кытта көрсүһүүгэ  Чурапчы, Сунтаар, Мэҥэ-Хаҥалас, Бүлүү, Нам, Ньурба, Хаҥалас, Горнай уонна Амма улуустарын  10 нэһилиэктэрин баһылыктара сырыттылар.

Эдэр көхтөөх дьону муниципальнай нэһилиэктэр сайдыыларыгар ыччаты кыттыытыгар туһуламмыт саҥа республикатааҕы программа түмтэ.

Информагентстваҕа бырайыак куратора, ыччат уонна дьиэ кэргэн политикатыгар  миниистири бастакы солбуйааччы Гаврил Семенов эппитинэн, «Нэһилиэк» бырайыагы тэрийии туһунан санаа 2012 сыллаахха үөскээбит. Эксперимент быһыытынан 35-гэр диэри саастаах  муниципальнай тэриллиилэр 10 баһылыктара талыллыбыттара. Үлэни ырытыһар кулууп тэриллибитэ, кинилэр министерство ыытар тэрээһиннэригэр кыттан барбыттара, граннар, инновационнай технологиялар бэриллибиттэрэ.

«Бу барыта эдэр салайааччылар бэйэ-бэйэлэригэр үлэҕэ  өйөһөлллөрүгэр, көмөлөсүһэллэригэр, урукку кыһалҕалары быһаарарга бииргэ толкуйдуулларыгар уонна нэһилиэккэ ыччаты угуйалларыгар ананар», - диэн бэлиэтээтэ кини.

Көрсүһүү хас биирдии кыттыылааҕа президеҥҥэ бэйэтин нэһилиэгэр ханнык хайысханы саҕалаабытын эбэтэр сайыннарыан баҕарарын туһунан кэпсээтэ. Үлэтигэр туох ситиһиилээҕин уонна ханнык ыарахаттары көрсөрүн үллэһиннэ. Онно биллибитинэн, үгүстэр ыччаты тыа хаһаайыстыбатыннан дьарыктанарга тардыан баҕарар эбит. Үгүстэри нэһилиэги бары өттүнэн хааччыйыылаах оҥоруу кыһалҕата долгутара билиннэ.

Холобур, Искра нэһилиэгин баһылыга Петр Абрамов  Ыһыах ыһарга анаммыт сири эдэр ыалларга биэрэргэ быһаарыммыт, онно газ бары өттүнэн хааччылыы киллэрэр санаалаах. Билигин 78 ыал 32 сир учаастагар сайабылыанньа биэрбит. Ыһыах ыһыллар сирин урукку уу ылар сиригэр көһөрөр санаалаах, онно билигин эдэр баһылык ууну оботторор үлэлэри ыытар былааннаах.
Оттон Горнай улууһун Одуну нэһилиэгин баһылыга  Владимир Скрыбыкин  Аҕа дойду Улуу сэриитин үбүлүөйүгэр  «70 үтүө дьыала» бырайыагы тэрийбит. Эдэр баһылык санаатын оройуон олохтоохторо өйөөбүттэр.

Егор Борисов эдэр лидердэр чопчу быһаарыыныларын сэҥээрдэ. «Өскөтүн сүбэ ылыаххытын баҕардаххытына, ыйытыҥ. Сиһилии уонна оруннаах буоллахтарына, мин олору өйүөҕүм. Миигин тылга киллэрэр олус уустук. Бэлэмнэниҥ, элбэхтэ ыйытыаҕым», -диэн сэрэттэ кини.
Көрсүһүү түмүгүнэн Его Борисов хас биирдии баһылыкка көҕүлээһиинэрин бырайыак быһыытынан оҥорон киниэхэ кулун тутар 8 күнүгэр диэри киллэрэллэригэр сорудахтаата.  «Нэһилиэк олохтоохторун өйөбүлэ суох тугу да олоххо киллэрэр кыаллыа суоҕа, онон хас биирдии санаа олохтоохтор өйөбүллэрин ылыахтаах. Салайааччы үлэтин сүрүн кыһалҕата— дьон олоҕун тупсарыы», - диэтэ президент.