«Гражданская платформаттан» депутат  Эрнст Березкин муниципальнай баһылыктар уонна депутаттар 285 илии баттааһыннарын хомуйбут. Федерация Сэбиэтигэр кини киллэрбит кандидаттара: парламент урукку спкерэ Василий Филиппов, РФ урукку прокуруорун солбуйааччы  Василий Колмогоров уонна «Якутскэнерго» кылаабынай инженерэ  Сергей Гаврилов. Э.Березкин эппитинэн, Нам, Хаҥалас, Мэҥэ-Хаҥалас уонна Бүлүү бөлөх улуустарын баһылыктарын уонна депутаттарын өйөбүллэрин ылбыт.

Егор Борисов быыбар киин хамыыһыйатыгар 285 илии баттааһыны туттарда. Федерация Сэбиэтигэр кини киллэрбит кандидаттара: норуот депутата Александр Дудников, эбэтэр «Якутия» авиакомпания генеральнай дириэктэрэ  Ольга Федорова, эбэтэр билиҥҥи сенатор Вячеслав Штыров.

Егор Борисов быыбар ыраастык уонна чиэһинэйдик барыахтааҕар, административнай ресурса туһаныллыа суохтааҕар болҕомтону тарта. «Бэйэм хамаандабар, дьаһалта, бырабыытыластыба үлэһиттэрэ, баһылыктар быыбар хаамыытыгар дьайбаттарыгар сорудахтаатым. Быыбар ыраас буолуохтаах, араас технология туттуллуо суохтаах. Дьону тылга киллэриэххэ, итэҕэтиэххэ уонна дакаастыахха наада диэн санаанан салайтарабын», - диэтэ кини.

Норуот депутата, либерал-демократтар бастыҥара Гаврил Парахин быыбар хамыыһыйатыгар 283 илии баттааһынын биэрдэ. Нерюнгри, Алдан, Ленскэй, Мииринэй, Орто Халыма, Үөһээ Халыма, Өймөкөөн олохтоохторо кинини көхтөөхтүк өйөөбүттэр. Федерация Сэбиэтигэр кини киллэрбит кандидаттара: РЛДП Алданнааҕы салаатын сүрүннээччи, оройуон сэбиэтин депутата  Валентин Семерков, Нерюнгрига баартыйа үлэтин сүрүннээччи, предприниматель Андрей Ткаченко, Ленскэйгэ баартыйа үлэтин сүрүннээччи адвокат Станислав Бессонов.

Саха сирин кылаабынай хомуньууһа, парламент бэрэссэдээтэлин солбуйааччы  Виктор Губарев 284 илии баттааһынын Быыбар киин хамыыһыйатыгар туттарда. Федерация Сэбиэтигэр кини киллэрбит кандидаттара: РФКП Саха сиринээҕи рескомун сэкирэтээрэ  Георгий Артемьев, Ил Түмэн депутата, «Эрэл» ХЭТ дириэктэрэ Иннокентий Васильев, экономика институтун кафедратын сэбиэдиссэйэ Любовь Заярная.

Россия пенсионердарын баартыйатыттан турбут кандидат Владимир Максимов Быыбар киин хамыыһыйатыгар ирдэниллэр докумуоннары хомуйбут. Федерация Сэбиэтигэр кини киллэрбит кандидаттара:  «Российской партии пенсионеров за справедливость» баартыйа Саха сиринээҕи салаатын салайааччыта  Николай Дьячковскай, эбэтэр ДЬКХ ГУП урукку генеральнай дириэктэрэ Станислав Цюхцинскай, эбэтэр предприниматель Станислав Гоголев.

«Зеленые» баартыйаттан турбут  Николай Сивков Быыбар киин хамыыыйатыгар кэлбэтэ. Докумуонун кини бэрэстэбиитэллэрэ туттардылар. Федерация Сэбиэтигэр кини киллэрбит кандидаттара:  Сахая Тимофеева, Наталия Янкова  уонна Константин Колодиев.