СИА-ҕа эппиттэринэн, вице-премьер Петр Алексеев салайааччылаах Саха сирин бырабылыыталыстыбатын бөлөҕө вертолекка баара. Ону таһынан халаан содулун туоратар уонна чөлүгэр түһэрэр үлэни сүрүннүүр дириэксийэ салайааччыта  Дмитрий Лепчиков, Өймөкөөн улууһун баһылыга  Михаил Захаров, министиэристибэлэр уонна биэдэмистибэлэр тутаах үлэһиттэрэ бааллара.

Өймөкөөн улууһугар күүстээх ардахтар кэннилэриттэн үөскээбит халаан содулун, оттуур ходуһалары үөрэтэр, чинчийэр соруктаах бу бөлөх айаннаабыт.

Күн бастакы аҥаарыгар Петр Алексеев уонна оробуочай бөлөх суол ардахтан алдьаммытын түмүгэр арыыланан хаалбыт Сордоҥнооҕор сылдьыбыттар. Ол кэнниттэн Үчүгэй сэлиэнньэтиттэн Томтого көтөн истэхтэринэ вертолет саахалламмыт.

Тута Томтор бөһүөлэгэр диэри бырабыыталыстыба бөлөҕө тиэрдиллибит. Медицинскэй чинчийии ким да эмсэҕэлээбэтэҕин быһаарбыт.