Березовкаҕа, Арҕахтаахха, Хатыҥнаахха, Сылгы Ыытарга, Налимскайга, Ойуһардаахха тииттэри, талахтары олортулар. Сыбаатай олохтоохторо 120 маһы олордон, нэһилиэккэ улахан көҕөрдүү үлэтин ыыттылар.

Бэлиэтээн эттэххэ, сорох нэһилиэктэргэ тэрилтэлэр үлэһиттэрэ эрэ буолбакка, түөлбэлэр, ыччат түмсүүлэрэ, бэтэрээннэр сэбиэттэрэ, бэл диэтэр, оскуола оҕолоро эмиэ ырааһырдыыга, көҕөрдүүгэ кыттыстылар. Билии күнүн көрсө ыччакка үтүө холобуру көрдөрөр быһыыга-майгыга биһиги бары түмсүүлээхпитин, айылҕа туһугар охсуһарбытын дакаастыыр.

Былырыын баччаҕа куоракка 393 киһи кыттыбыта. Онно улуус баһылыга Евгений Слепцов субуотунньук үтүө түмүгү аҕаларын иһин сылга хаста да ыытыллыан наадатын эппитэ. Ол курдук, куоракка маннык хабааннаах субуотунньук быйыл иккитэ ыытылынна. Ыам ыйын 16 күнүгэр куораты ырааһырдыыга 51 тэрилтэттэн 262 киһи кыттыбыта. Быйыл 164 киһи таҕыста. Маны таһынан, балаҕан ыйын 4 уонна 5 күннэригэр куорат олохтоохторо бэйэлэрин дьиэлэрин иннинээҕи тиэргэннэрин хомуннулар.

Бу курдук инникитин ыраас-чэбдик туһугар бука бары биир өйүнэн-санаанан туруулаһыаҕыҥ.