Санатан эттэххэ, тохсунньу 23 күнүгэр аһаҕас халлаан анныгар Орто Халыма куоракка 40-тан тахса кыраадыс тымныыга 500-тэн тахса киһилээх (сурукка киирбитинэн 310 киһи) дискотека ыытыллыбыта. Ирдэбил быһыытынан 30 мүнүүтэ устата тохтоло суох үҥкүү барыахтааҕа. Ону куорат дьоно, тыалартан да кэлбит кыттааччылар 3 чаас кэриҥэ үҥкүүлээбиттэрэ.

Бырайыак ааптара, чааһынай предприниматель Афанасий Бубякин өр сыллаах ыра санаата туолан, үөрүүтэ муҥура суох.

СИА корреспонденыгар кини санаатын бу курдук үллэһиннэ:

- Тэрээһин кэнниттэн тута Россияҕа уонна Англияҕа дакаастабыл матырыйааллары хомуйуу түбүгэр түспүппүт. Туох баар видео уонна фото-устуулары түмэн, үчүгэй хаачыстыбалаахтары тала сатаабыппыт. Манна бэлиэтээн этиэххэ аныгы аппаратура биһиги тыйыс усулуобуйабытыгар толору кыаҕынан үлэлиир кыаҕа суох эбит. Салгын паара устууга мэһэйдээн, биир да үчүгэй хаачыстыбалаах хаартыскаҕа түһэрии суоҕун тэҥэ. Оттон видеонан устуу араас сиртэн, дьиэ иһиттэн даҕаны оҥоһуллубут буолан, хаачыстыбата эппиэттэһэр этэ.

Кэлин бэйэбит олохтоох студиябытыгар кылгас киинэ оҥорбуппут уонна дьон дьүүлүгэр таһаарбыппыт.

Маны сэргэ музыкальнай аппаратураҕа эмиэ кыһаҕаламмыппыт. Америкаттан эрдэ колонкалары сакаастаан ылбытым уонна ол фирманы кытта сибээстэһэммин, маннык тымныыга туһаныахтаахпын диэн сэрэппитим. Кинилэр колонкаларын атыыга таһаарыахтарын иннинэ тымныы усулуобуйаҕа боруобалаабатахтара чахчы, ол иһин олус интэриэһиргээбиттэрэ уонна түмүгүн биллэрээр диэн көрдөспүттэрэ. Үҥкүү кэмигэр биир колонка динамигын диффузора хайа барбыт этэ, тымныыны тулуйбакка. Оннук буолла диэн фирмаларга биллэрбиппэр, босхо саҥа колонканы ыыттылар.

Афанасий бу манан уоскуйар санаата суох. Син биир тугу эрэ саҥаны толкуйдуу сылдьар эрээри, онтун билиҥҥитэ биһигинниин үллэстибэтэ. Түгэнинэн туһанан, кини таһырдьааҥы дискотеканы тэрийиигэ көмөлөспүт бар дьоҥҥо истиҥ махталын тиэрдэр.

Билигин аны аан дойдутааҕы Гиннесс рекордун түмүгүн долгуйа күүтэбит.