Аан дойдутааҕы Гиннесс рекордун кинигэтигэр киирэргэ сүрүн ирдэбиллэринэн 40-тан тахса тымныы буолуохтааҕа, үҥкүүгэ 100-тэн тахса киһи кыттыахтааҕа уонна тэбис тэҥҥэ 30 мүнүүтэ устата үҥкүүлүөхтээҕэ.

Оттон тохсунньу 23 күнүгэр Орто Халыма куорат Анкудинка үрэҕин үрдүгэр барыллаан ааҕыынан 300-тэн тахса киһи кэлэн үҥкүүгэ кытынна. Уоттаах-күөстээх дискотекаҕа саамай аҕа уонна кыра саастаах кыттааччылар диэн анал номинация олохтоммута.

Былааннаммытын курдук, манна бу күннэргэ 100 сааһын туолбут улуус ытык кырдьаҕаһа Мария Петровна Кокорина кэлэн үйэтигэр бу курдук бастакытын тэриллибит улахан үҥкүүгэ кыттыста. Ону кытта 1 саастаах кырачаан Саша Третьяков үҥкүүлэстэ. Кинилэргэ олохтоммут анал бэлэҕи Саха сирин Моруос Оҕонньор - Чысхаан туттарда.

Үҥкүүгэ аҕыйах ахсааннаах хотугу норуоттар бэрэстэбиитэллэрэ - эбээннэр - төрүт таҥастарын кэтэн кэллилэр, ону кытта биһиги эбэлэрбит, көхтөөх дьоммут, сахалыы соннорун кэтэн норуоттар сомоҕолоһууларын туоһутунан буоллулар.

Бу күн кыратыттан аҕам саастааҕар диэри улуус олохтоохторо биир тыынынан, илии-илиилэриттэн ылсан үҥкүүлээн аан дойду рекордун олохтоотулар. Кинилэри тэрийээччилэр халымалар төрүт астарынан — тоҥ балыгынан күндүлээтилэр. Тымныы дискотека сахалыы сиэринэн оһуохайынан түмүктэннэ.

Бу курдук, Орто Халыма куорат олохтооҕо, урбаанньыт Афанасий Бубякин хас да сыллаах баҕа санаата туолан, биир дойдулаахтарыгар үйэлэргэ умнуллубат бэлэҕи оҥордо.