Барыта табылыннаҕына уонна саамай сүрүнэ - ыытыллар күнүгэр халлаан 40-50 кыраадыска тиийэ тымныйдаҕына, Орто Халыма олохтоохторо аһаҕас халлаан анныгар үҥкүүлээн, рекорд олохтуур кыахтаахтар.

Афанасий Бубякин Халыманы Гиннесс кинигэтигэр уруккуттан киллэртэрэр баҕа санаалаах эбит. Икки сыллааҕыта оннук идеялаах куорат салалтатыгар тиийэ сылдьыбыт, ол эрээри сөптөөх өйөбүлү көрсүбэтэх. Кини Москваҕа баар экспертнэй салаалары кытта суруйсарын тохтоппотох. Оттон бу сайын муҥутуур тымныыга уулуссаҕа үҥкүүнү тэрийдэххэ хайдах буолуой, диэн сайаапка түһэрбитин өйөөннөр, сөбүлэҥ эппиэти ыыппыттар. Онон кынаттанан, куорат дьаһалтатыгар тиийэн санаатын кытта үллэстибит. Бу сырыыга өйөбүл ылан, этэргэ дылы, муус оннуттан хамсаабыт.

Афанасий Афанасьевич эппитинэн, бу тэрээһиҥҥэ элбэх анал уот-күөс туһаныллыаҕа, лазернай шоу буолуоҕа. Онон көрөөччүгэ, чуолаан оҕо-аймахха ордук интэриэһинэй буолуо диэн эрэннэрэр. Итини сэргэ саамай саастаах уонна эдэр кыттааччыны анал бириистэр күүтэллэр диэтэ.

Улуустааҕы хаһыат редактора Римма Ноговицына: «Афанасий Афанасьевич сайаапкатын сэтинньигэ түһэрбитэ. Онон үс ый иһигэр тэрээһиммитин ыытыахтаахпыт. Былырыын ахсынньы бүтэһигэр халлааммыт 40 кыраадыстан намтаабатаҕа, ол иһин Кириһиэнньэҕэ тэрийэр санаалаахпыт. Балаһыанньа быһыытынан, сүүстэн итэҕэһэ суох киһи отучча мүнүүтэ үҥкүүлүөхтээх. Халымалар бу тэрээһиннэринэн тымныы кыһыннаах Саха сирин олохтоохторо үөрүнньэҥнэрин, кэрэҕэ тардыһыылара күүстээҕин аан дойдуга кэрэһилиэхтэрэ», - диэтэ.