«Саха сирин Төрүт Сокуонун 78-с ыстатыйатын 3 чааһыгар сөп түбэһиннэрэн, бырабыыталыстыба боломуочуйатын тохтотор. Бу сарсыарда миниистирдэр кабинеттарын мунньаҕа буолбута. Онно бу ый 29 күнүттэн ыла боломуочуйаны тохтотор уонна бырабыыталыстыба саҥа састааба үөскэтиллиэр диэри үлэтин салгыырын туһунан ыйаахха өрөспүүбүлүкэ баһылыга илии баттыаҕа», - диэн СИА-ҕа эттэ баһылык уонна бырабыыталыстыба дьаһалтатын көрдөрөр-иһитиннэрэ тиһиктэри кытта үлэтин сүрүннүүр управление салайааччыта Афанасий Егоров.

Бу нэдиэлэҕэ өрөспүүбүлүкэ баһылыга бырабыыталыстыба саҥа бэрэссэдээтэлин, кини солбуйааччыларын уонна миниистирдэр кандидатураларын парламеҥҥа киллэриэҕэ.

Чопчу ааттар тустарынан комментарий билиҥҥитэ суох. Саха Өрөспүүбүлүкэтин баһылыга Егор Борисов бырабыыталыстыба састаабыгар улахан уларыйыы тахсыа суоҕун туһунан хаста да эппитэ. Миниистирдэр баһыйар үгүстэрэ дуоһунастарыгар хаалыахтара.