Анал ирдэбил быһыытынан улууска биирдиилээн атыылыыр атыы-эргиэн тэрилтэлэриттэн 11 маҕаьыын, атыы туочуката хонтуруолга турда: «Татыйыына», «Сатурн», «Туйаара», «Фудмаркет», «Лакомка», «Аартык», «Успех», «Новил» ас киоската, «Пятерка», «Мария» ырыынак ас киоската уонна «Центр» ас киоската. Бу ас атыылыыр араас таһымнаах туочукаларга күннэтэ 40 тыа хаһаайыстыбатын бородууксуйатын, фрукта уонна атын ас-үөл сыанатын хонтуруоллуур үлэ бара турар. Даҕатан эттэххэ, испииһэккэ киирбит астарга килиэп, бурдук, курупа арааһа, саахар, ыраас уу, халбаһыы, эт арааһа, уут оноһуктар, оҕуруот аһа, буруукта, сымыыт бааллар.

Күннээҕи үлэ түмүгүнэн оройуоннааҕы хамыыһыйа тустаах быһаарыныы ылар, Федеральнай судаарыстыбаннай статистика сулууспатыгар сыана мониторинын отчуотун ыытар, сыана үрдээһинэ таҕыстаҕына өрөспүүбүлүкэ анал штабыгар уонна тустаах хонтуруоллуур уорганнарга биллэрэр.

Бу кэтээһин сыл бүтүөр дылы барыахтаах, эһиилги сылга мониторинг түмүгүнэн быһаарыныылар, миэрэлэр ылыллан үлэ салҕанара былааннанар, диэн оройуон пресс-сулууспата иһитиннэрэр.