Сыана политикатын государственнай кэмитиэтин- регионнааҕы энергетическэй хамыыһыйа бэрэссэдээтэлэ Антонина Винокурова өрөспүүбүлүкэҕэ сыана политикатын бэрээдэктииргэ хонтуруоллуур уорганнары кытта хардарыта дьайсыылаах үлэ ыытылларын бэлиэтээтэ. Аска уонна эмкэ сыана үрдээһинин хаарчахтыыр, эрдэттэн сэрэтэр былаан оҥоһуллубутун кини ойуччу тутан бэлиэтээтэ. 

«Өрөспүүбүлүкэҕэ тэриллибит штаб сыананы уонна ас саппааһа төһөтүн хонтуруоллуур. Оҥоһуллубут былааны киэҥ ырытыыга таһаарар соруктаахпыт. Онно норуот хонтуроллааччылара кыттыахтара», - диэтэ Антонина Винокурова.  

Кини эппитинэн, Госкомстат нэдиэлэ аайы ас сыанатын бэрэбиэркэлиир. Ахсынньы, тохсунньу ыйдарга маннык ырытыыны күн аайы оҥорбуттара.

«Сыана балачча бигэтийбитинэн, олунньуттан ыла хонтуруол нэдиэлэ аайы оҥоһуллар буолла. Аһы таһынан эмп, табаар сыанатын кэтээн көрөбүт», - диэтэ кини.

Тутаах суолталаах эмтэр ахсааннарыгар киирсэр эмп сыанатын хонтуруоллуохтара.

«Бу испииһэккэ киирбэт эмтэр бэрэбиэркэ тас өттүгэр хаалаллар. Ол иһин тутаах суолталаах эмтэр ахсааннарыгар киирсибэт сорох эмп, саамай наадалаах табаар сыаналарын кэтээн көрөр соруктаахпыт», - диэтэ Антонина Винокурова.