Өйдүүр буолуохтааххыт, былырыын ахсынньы 8 күнүгэр 100 тахса кыттааччылаах «Ыллаа, туой – тыам сирэ!» бырайык кэнсиэргэ арылыйар уулардаах, дьэдьэн дыргыл сыттаах, эриэккэс дьикти айылҕалаах, күннээх Амматтан – Сатаҕайтан, дьүкээбил суһумнаах Аллаайыхаттан – Чокурдаахтар, Русскай Устьелар, мэндэ хайа үрдүгэр олохсуйбут Манчаарыттан сыдьааннаах ырыа – тойук аргыстаах Мэҥэ – Хаҥалас Бүтэйдээҕиттэн, Мэлдьэхсититтэн, Суолатыттан, Өлүөнэ биэрэгэр, үрдүк көҕөрөр мыраан тэллэҕэр, арчылыыр Аар ытык Кубалаах, Эҥсиэли хочотун Аппаанытыттан, Хамаҕаттатыттан, Тойон Мүрү, Кыыс Хаҥа, Эллэй, Хоро өбүгэлээрдээх, Майаҕатта Бэрт Хараттан бөҕөс быһый уолаттардаах Уус–Алдан Сыырдааҕыттан, Чараҥыттан, тулхадыйбат тулааһыннаах, тоҕус томтордоох Чурапчы Кытаанаҕыттан бэйэлэрин айар талааннарын көрдөрөн астынан тарҕаспыттара, көрбүт – истибит дьон биһирээбиттэрэ.

Онтон быйыл «Ыллаа, туой – тыам сирэ!» иккис чааһын салгыыбыт

Истиҥ эйэҕэс, күндүттэн күндү көрөөччүлэрбитигэр эһиэхэ эрэ анаан көр-күлүү бастыҥын, ырыа эриэккэһин, үҥкүү үлүскэннээҕин аныыллар хаһан да, ханна да көстүбэтэх тапталлаах тыабыт сирин талба – мааны талааннаахтара.

Үнкүү–битии доҕуһуоллаах үлэттэн дьолломмут үрдүккэ дьулуспут Горнай Маҕараһыттан саҥа ааттары көрүөххүт, билсиэххит.«Маҕарас маладьыастара» сал. Владимир Текеянов. Иллээх олоҕу олохтоон, саха омугу холбуурга санаатын өйүн түмэргэ умнуллубат өҥөлөөх, удьуор харылы бэйэлээх, халыан дохсун санаалаах халыҥ Хаҥалас үтүө үлэһит дьоннорун талааннаах ырыаһыттарын кытта алтыһыаххыт. Олоҥхо дойдутун Сунтаарыттан кэрэ куоластаах Анатолий Григорьев, Тойон Мүрү, Кыыс Хаҥа, Эллэй, Хоро өбүгэлэрдээх Уус–Алдан Сыырдааҕыттан эриэккэс ырыаһыттар Александр Иванов, Иннокентий Алексеев уонна да атын эдэр чаҕылхай тыа сирин сулустара кыттыахтара.

Күндү көрөөччүлэрбитин истиҥ мичээргитинэн, көхтөөхкыттыыгытынан, ахтылҕаҥҥытын таһааран дойдугут мүөттээх салгынын иҥэринин, күүстэ – уохта ылынан!

Тыа сирэ – дьолум – соргум биһигэ, сүрэҕим күөх сирэмэ.

Тыам сирэ – дьылҕам самаан сайына,

Олоруум уостубат быйаҥа.

Тыам сирэ, тыам сирэ

Мин көҥүл тыыныым куйаара,

Киэнинэн долгуйар куйаара

Тыам сирэ, тыам сирэ –

Сайаҕас сарыаллаах санаакам

Саймаара тыллар салгына.

Тыам сирэ, тыам сирэ –

Сахалыы кутум уйата,

Сахалыы айылгым тутула.

Тыа сирэ талаан биһигэ буоларын итэҕэйиҥ.