Ол көрсүһүүлэр тыҥааһыннаах быһыыга-майгыга ааспыттара. Итини президент өйдөөбүтэ. Дьиэлэрин уонна өр сыллар усталарыгар муспут бас билиилэрин биир чаас иһигэр сүтэрбит дьонтон холку сыһыаны эрэйбэккин.

Ол эрээри Егор Афанасьевич барыларын уоскуйарга, айылҕа иэдээнигэр буруйдааҕы көрдөөбөккө, инники туһунан саныырга сүбэлээбитэ.

Егор Борисов сыл бүтүүтэ чөлүгэр түһэрэр үлэлэр түмүктэрин көрө, нэһилиэнньэни кытта көрсүһэ өссө кэлиэм диэн эрэннэрбитэ.

Дьон президент тылын ылыммыттара. Уус-Ньараҕа субботниктар ыытыллыбыттара, ыччат волонтерскай этэрээттэрэ тэриллибиттэрэ, оттон бөһүөлэк уонна оройуон общественнай сэбиэттэрэ муниципальнай былааһы кытта алтыһан үлэлээбиттэрэ.

Республика уонна федеральнай киин көмөлөрө кэмигэр кэлбиттэрэ. Вице-премьер Анатолий Скрыбыкин эппитинэн, тыһыынча аҥарыттан ордук олохтоохтор 200-тэн 500 тыыһыынчаҕа тиийэ үбүнэн көмөнү туппуттара. Оттон 117 ыал тус дьиэлэрин чөлүгэр түһэрэргэ босхо тутуу матырыйаалларын ылбыттара.

Бу көрсүһүү эмиэ ыйытыы уонна хоруй быһыытынан ааста. Дьиктиргиэх иһин, сайыҥҥы халаан кыһалҕаларын боппуруостара сүрүн миэстэни ылбатылар. Биллэн турар, эмсэҕэлээбит дьон бары испииһэккэ киллэриллибит буолбатахтар. Халаан элбэх ыал сылаас дойдуларга сынньана барбыт кэмнэригэр, сайыҥҥы уоппуска кэмигэр ааспыта.

Егор Борисов итинник балаһыанньаҕа түбэспиттэри куттаммакка суукка биэрэн иһиҥ диэн сүбэлээтэ.

- Биһиги правовой государствоҕа олоробут, - диэн бэлиэтээтэ Егор Афанасьевич, - онон дьайыыларбыт сокуоҥҥа сөп түбэһиэхтээхтэр.

Ол эрээри ити ити түгэн президент олохтоохтору кытта көрсүһүүтүн кыра чааһа буолла. Буоларын курдук, Егор Борисовка араас ыйытыылары биэрдилэр.

Өймөкөөн оройуонун олох-дьаһах коммунальнай хаһаайыстыбатынан дьарыктанар «Теплоэнергосервис» хампаанньа үлэтин туһунан боппуруос улахан долгуйууну таһаарда. Егор Борисов нэһилиэнньэ санаатын кытта сөбүлэстэ, кини эмиэ ити хампаанньа үлэтигэр элбэх боппуруостааҕын туһунан эттэ.

Билигин «Теплоэнергосервис» республик үгүс нэһилиэнньэлээх пууннарын кытта үлэлэһэр- Алдан, Томмот уонна Усть-Куйга. Онно барытыгар ити хампаанньа үлэтигэр элбэх ыйытыылар үөскүүллэр.

- Арааһа манна кэккэ кыһалҕалар бааллар быһыылаах, - диэн түмүк оҥордо Егор Афанасьевич.

Итинэн ситимнээн президент сонно ОДьКХ уонна энергетика миниистиригэр Алексей Колодезниковка сөптөөх матырыйаалы бэлэмнииргэ уонна «Теплоэнергосервис» хампаанньа эппиэтинэһин правительство таһымыгар дьүүллэһэргэ эттэ.

Бу киэһэ Уус-Ньара олохтоохторо правительствоҕа уонна президеҥҥэ тус бэйэтигэр элбэх сылаас тыллары эттилэр. Итиннэ Егор Борисов сайыҥҥа халаан содулларын туоратыыгар көхтөөх кыттыыны ылбыт Өймөкөөн общественноһыгар уонна тэрилтэлэр салайааччыларыгар истиҥ махталын биллэрдэ.