-- Ол туох уларытыы киирэрий? – диэн Ил Түмэн олохтоох салайыныыга кэмитиэтин салайааччы Василий Местниковтан ыйыттыбыт.

-- Ити үөһээ этиллибит федеральнай сокуон ирдэбилинэн, алта ый иһинэн, ол аата бу дьыл сэтинньи 27 күнүгэр диэри «Саха Республикатыгар олохтоох салайыныы туһунан» сокуонугар олохтоох салайыныы органнарын талыы бэрээдэгэр тустаах уларытыылары киллэриэхтээхпит. Ол эбэтэрнэһилиэк, улуус баһылыктарын, депутаттарын быыбарынан талабыт дуу эбэтэр депутаттар истэриттэн талабыт дуу диэн боппуруос турар. Онуоха бу сааскыттан ыла нэһилиэк, улуус, өрөспүүбүлүкэ таһымнарыгар үгүс кэпсэтии, дьүүллэһии буолла, улуустартан үгүс этии киирдэ.Өрөспүүбүлүкэбаһыйар улуустарын олохтоохторун санааларын учуоттаан, биһиги сокуон барылын бэлэмнээтибит уонна бу бээтинсэҕэ парламент истиитигэр билиһиннэрэн баран, норуоту кытта бүтэһиктээх дьүүллэһиигэ киллэрээри олоробут.

 Регионнар санааларын тоҕо учуокка ыллылар?

 -- Федерация Сэбиэтин чилиэнэ Степан Киричук бу саас Саха сиригэр кэлэ сылдьыытыгар Ил Түмэн депутаттара, олохтоох салайыныы общественноһа биһиги өрөспүүбүлүкэбитигэр муниципалитеттар баһылыктарын уонна депутаттарын анааһынынан буолбакка, быыбардааһын бэрээдэгин хаалларарга туруорсалларын эппиттэрэ. Онно Степан Киричук биһиги туруорсуубутун истэн, дойду тэбэр сүрэҕэр тиийэн, бу сокуону регионнар тус усулуобуйаларын учуоттаан, сөптөөхбыһаарыныылары миэстэтигэр бэйэлэрэ ылыналларыгар эппитэ, -- диэн быһаарар Василий Местников.

 - Баһылыктары аныыбыт дуу, талабыт дуу?

 Оттон улуустардааҕы араас таһымнаах муниципальнай уорганнар бэрэстэбиитэллэрэ бу боппуруоска туох санаалаахтарый?

Виктор ПАВЛОВ, Дьааҥы улууһун "Верхоянскай оройуона" МТ баһылыга:

-- Мин санаабар, улуус баһылыгын олохтоохтор куоластаан талаллара ордук. Оттон нэһилиэк баһылыктарын бэрэстэбиитэллээх уорган депутаттара бэйэлэрин истэриттэн таллахтарына, быыбардааччыларын иннигэр эппиэтинэстээх буолуо этилэр. Туох кистэлэ кэлиэй, нэһилиэктэргэ аймахтаһыы да, бэйэ икки ардыгар хайдыһыы да баар. Депутаттар талбыт баһылыктарын үлэтин хонтуруоллуо да этилэр.

Василий ПАВЛОВ, Кэбээйи улууһун "Ньидьили нэһилиэгэ" МТ баһылыга:

-- Биллэн турар, улуус да, нэһилиэк да баһылыктарын быыбардааччылар талаллара ордук. Бүтүн нэһилиэк дьылҕатын уонча киһи быһаарарынааҕар, норуот бэйэтэ куоластыыра быдан итэҕэтиилээх буоллаҕа.

Уруйдаана ЕГОРОВА, Өймөкөөн улууһун "Төрүт нэһилиэгэ" МТ бэрэстэбиитэллээх уорганын депутата:

-- Улуус буоллун, нэһилиэк буоллун, баһылыгы норуот бэйэтэ куоластаан талара быдан ордук. Нэһилиэк депутатынан сүрүннээн тус үлэлээх киһи общественнай ноҕорууска быһыытынан талыллан үлэлиир. Онон депутаттар быһаарыыларынан баһылыгынан ананнаҕына, бу киһи сүрүн үлэтиттэн уурайар буоллаҕа дии. Оттон депутаттартан оннукка сөбүлэһэр да киһи ахсааннаах буолуоҕа.

Норуот быыбардыырга үөрэннэ

-- Уруккуга холоотоххо, кэлиҥҥи сылларга дьон-сэргэ быыбардыырга үөрэннэ. Ол курдук, "улууһум уонна нэһилиэгим сайдыыта бу быыбартан улахан тутулуктаах" диэн олохтоохтук толкуйдаан баран куоластыыр киһи ахсаана биллэ эбилиннэ. Муниципальнай быыбардары тэрийэн, үрдүкү былаас норуокка бэйэтин дьылҕатын түстэнэригэр кыах биэриитэ улахан суолталанна. Оттон норуот талбыт былааһа хайдах үлэлиирэ, ол общественностан бэйэтиттэн тутулуктаах. Үлэлээбэт баһылыктары общественнай сэбиэттэр хамсатыахтарын наада. Онон баһылыктары норуот бэйэтэ талара ордуга чахчы, -- диэн санаатын эттэ кэпсэтиибит түмүгэр Ил Түмэн депутата Василий Местников.

Оттон сарсын, бээтинсэҕэ, 11 чаастан Ил Түмэн депутаттара бу боппуруоска бэйэлэрин санааларын хото этиниэхтэрэ.